Негізгі заңның 40 қа жуық бабы өзгереді Тоқаев

АСТАНА, 14 қазан – Sputnik. Президент парламенттік реформа жөніндегі жұмыс тобының бірінші отырысында сөз сөйледі, деп хабарлады Ақорда.

Мемлекет басшысы бір палаталы парламент құру туралы бастама инновациялық саяси шешім болғанын, дегенмен қазір ел ішінде, әлеуметтік желіде түрлі ой-пікірлер айтылып жатқанын ескертті.

"Басым көпшілігі мұны "әбден пісіп-жетілген мәселе" деп санайды. Тіпті, "Халықтың көбі қолдаған бастаманы талқылап, референдум өткізудің қажеті жоқ" деген ойлар да айтылып жатыр. "Реформаны созудың қажеті жоқ, таяу арада қысқа мерзім ішінде жасай салуға болады" деген пікірлер де бар. Шын мәнінде, қай жағынан алып қарасақ та, мәселе өте өзекті. Азаматтарымыздың әртүрлі пікір айтып, белсенді болғаны – жақсы үдеріс", - деді Қасым-Жомарт Тоқаев.

Президент парламенттік реформа аса күрделі жұмыс болғандықтан, асығыстыққа жол беруге болматынын айтты.

"Мемлекет басшысы ретінде мен үшін парламент – еліміздегі саяси жүйенің негізгі тірегі. Сондықтан алдымен Конституцияға бірқатар өзгеріс енгізу қажет болады. Негізгі заңның 40-қа жуық бабы өзгереді. Содан соң кем дегенде 10 конституциялық заңға және 50-ден астам кодекс пен заңға түзету енгізу керек болады. Мұны жаңа Конституция қабылдаумен тең келетін іс деуге болады", - деді мемлекет басшысы.

Ол бұл жұмыстың бәрін табан астында, бір сәтте жүзеге асыру мүмкін еместігін, сол себепті тыңғылықты дайындық керектігін мәлімдеді.