Нұрай сияқты қашан өлетінімді күтейін бе? : Қызылордалық қыз өзіне қауіп төніп тұрғанын айтты

Шымкент қаласында 21 жастағы Нұрай Серікбайдың сталкердің қолынан қаза табуы қоғамдағы өзекті мәселеге айналып отыр, – деп хабарлайды Aikyn.kz.

Белгілі болғандай, ол полицияға арыз түсіргенмен, нәтиже болмай, соңы қайғылы оқиғамен аяқталды.

Осы жағдайдан кейін Қызылорда қаласының тұрғыны Жазира Қуанышбай да өз өміріне қауіп төніп тұрғанын айтып, әлеуметтік желіде жазба жариялады. Бойжеткен бейтаныс адам өзін алты ай бойы күзетіп, соңына түскенін жеткізді. 

«Тура Нұрайдың оқиғасы басымнан өтіп жатыр. Қызылордада тұрамын. Полиция мен прокуратураға бірнеше рет арыз жаздым. Қауіпсіздігім үшін жалғыз жүрмеуге тырысамын, кейде тіпті 102-ге хабарласуға мәжбүр боламын, жалғыз жүрмеймін. Тек бір ғана жауап – мен тірімін», – дейді ол.

 Айтуынша, ол құқық қорғау органдарына бірнеше рет жүгініп, нақты дәлел ұсынғанымен нәтиже болмай отыр. 

«Дүниеде жоқ Нұрайды қоғам ақтай алмай жатқанда, тірі мені қорғай ала ма? Жарты жылдан асты, сталкингтің құрбаны болып жүрмін. Ата-анам, туысқан ағаларым, тәтелерім, әріптестерім барлығы куә. Барлық әрекетті жасадық, тіпті оның туыстары да сөзді түсінбей, айтқандарын тыңдамай жатқанын айтты. Барлық әрекетті жасадым, сөзге түсінбей, іс-әрекетін әлі күнге дейін жалғастырып жатыр. Солай Қызылорда қаласының құзырлы органдарына дабыл қақтым», - дейді қыз.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.