Ол неге кешірім сұрамайды? : әлеуметтік желіде Jah Khalib ке қатысты дау туды

Әлеуметтік желіде әйелдерге қатысты айтқан пікірі үшін Қазақстандағы концерті тоқтатылған, Jah Khalib лақап атымен танымал қазақстандық орындаушы Бахтияр Мамедовты шақыру қоғамда наразылық тудырды, – деп хабарлайды Aikyn.kz сайты.

Рэпер бұған дейін бір подкаст барысында әйелдердің киіміне қатысты өз ойын білдіріп, мұсылман ер адамдар оранған әйелдерді зорлықтан қорғайтынын айтқан еді.

“Мысалы, менің әйелім оранып сауда орталығына барады. Егер оған біреу тиіскісі келсе, жанындағы мұсылман бауырым оны байқап, қорғайды. Көшеде ер адамдар әйеліме жаман оймен қарамайды. Мен әйеліме қауіп төніп тұрмағанын білгендіктен, уайымсыз отыра аламын”, – деген еді Jah Khalib.

Сол подкастта қатысушы Жаслан Айтмағанбетов те әйелдерге жасалатын шабуылдардың 85 пайызы “қате жерде, қате киіммен, қате уақытта жүргендіктен” болатынын айтқан. Рэпер бұл пікірді қолдап, “Екінші себебі – қате киім” деп қосымша пікір білдірген.

Бұл мәлімдемелер Қазақстандағы қоғам мен әйел құқықтарын қорғаушылар арасында үлкен дау тудырды. Тамыз айында рэпер қызының денсаулығына байланысты Қазақстандағы барлық концертін тоқтатқан еді.

Жақында ол қараша айының соңында Бішкекте концерт беретінін хабарлады. Бірақ Қырғызстан тұрғындарының бір бөлігі де Jah Khalib-тің бұл елде өнер көрсетуіне қарсы пікір білдіріп жатыр.

“Jah Khalib Қазақстанда бірнеше рет концерт өткізуге тырысты, бірақ өтпей қалды. Енді Қырғызстанда жоспарлап отыр. Ол жақтың тұрғындары да қарсы. Ол неге өз сөздері үшін кешірім сұрамайды, ақталмайды? Әлде ол өз пікірін әлі де дұрыс деп санай ма?”, – деп жазды әлеуметтік желі қолданушылары.