Өлім жітім 80% ға дейін: Африка елінде қауіпті вирус шықты

АСТАНА, 16 қараша – Sputnik. Африканың ауруларды бақылау және алдын алу орталықтары Эфиопияның оңтүстігінде Марбург вирусы шыққанын мәлімдеді, деп хабарлайды Sputnik Қазақстан.

Бұл ең қауіпті геморрагиялық вирустардың бірі: инкубациялық кезеңі 21 күнге дейін созылады, оны жұқтырған науқастардан қан кетіп, қалтырап, құсады және іші өтеді. Мамандардың бағалауынша, өлім-жітім деңгейі 25%-дан 80%-ға дейін жетуі мүмкін, деп жазды The Guardian.

ДДСҰ басшысы Тедрос Адханом Гебрейесус аймақта аурудың тоғыз жағдайы анықталғанын мәлімдеді. Africa CDC Эфиопияның ұлттық зертханасы вирустың барын растағанын және штаммның Шығыс Африкада бұрын тіркелген түрлерге ұқсас екенін нақтылады.

Ел билігі Джинка ауданында індеттің таралуын оқшаулау және эпидемиологиялық зерттеу жұмыстарын бастады. Africa CDC инфекцияның аймақтың басқа бөліктеріне таралу қаупін төмендету үшін Эфиопияға қолдау көрсететінін мәлімдеді.

Бұған дейін Марбург вирусы Танзания мен Руандада өршіген. Әзірге вирусқа қарсы вакцина жоқ, бірақ симптомдарды емдеу және ағзаны сұйықтықпен толықтыру (регидратация) өмір сүру мүмкіндігін арттыруға көмектеседі. Өткен жылы Руандада Сабина вакцина институты әзірлеген вакцина сынақтан өткізілді.

Еске сала кетейік, Ақтөбеде Ганконг тұмауы анықталды. Тұрғындардың дене қызуы көтеріліп, жаппай жөтеліп жатыр.