Олимпиада алтыны үшін қазақстандық спортшылар шамамен 250 мың доллар алады

2026 жылғы Италияда өтетін қысқы Олимпиада ойындарында жеңіске жеткен спортшыларға берілетін ақшалай сыйақылар белгілі болды.
Forbes мәліметінше, Қазақстан алтын медаль үшін ең жоғары төлем ұсынатын елдердің қатарына кіріп отыр.

Басылымның жазуынша, Милан мен Кортинада өтетін Олимпиадаға қатысатын 92 ел мен аумақтың кемінде 37-сі спортшыларына медаль үшін қаржылай бонус төлейді. Жекелей спорт түрінде алтын алған атлеттерге берілетін сыйақы мөлшері елдерге қарай айтарлықтай өзгереді. Жаңа Зеландияда шамамен $3 мың болса, Сингапурда $787 мыңға дейін жетеді. Сондай-ақ жоғары төлем ұсынатындар қатарында Гонконг ($768 мың) пен Польша ($355 мың) бар.

Forbes дерегіне сәйкес, Қазақстанда жекелей дисциплина бойынша Олимпиада чемпионы атанған спортшы шамамен $250 мың алады. Бұл көрсеткіш Италиядағы ($213 мың), Кипрдегі ($177 мың), Болгариядағы ($151 мың), Литвадағы ($133 мың), Косоводағы ($130 мың) және Эстониядағы ($118 мың) төлемдерден жоғары.

Салыстыру үшін, АҚШ-та Олимпиада чемпионына берілетін бонус небәрі $37 500-ды құрайды. Жалпы алғанда, кемінде 13 ел мен аумақ әрбір жекелей алтын иегеріне $100 мыңнан астам сыйақы төлеуге дайын.

Айта кетейік, 2026 жылғы қысқы Олимпиада ойындарының алтын медальдарының құрамында шамамен 6 грамм алтын және 500 грамм күміс бар. Қазіргі металл бағасын есептегенде, бір медальдың өзіндік құны $1 мыңнан асады.