Өндіріс қарқыны артады: ҚМГ компаниялары 2025 нәтижесін жариялады

Ақтауда «ҚазМұнайГаз» ҰК АҚ Басқарма төрағасы Асхат Хасеновтың төрағалығымен ҚМГ-ның мұнай сервистік ұйымдары қатысқан жиын өтті. Басқосуда 2025 жылғы жұмыс нәтижелері мен 2030 жылға дейінгі даму жоспарлары қарастырылды.

Кеңесте «Oil Services Company», «Oil Construction Company», «Ойл Транспорт Корпорейшэн», «Өзенмұнайсервис», «Кен-Құрылыс-Сервис», «Маңғыстауэнергомұнай», «Су өндіру және тасымалдау басқармасы», «Мұнайтелеком» және «KMG EP-Catering» компанияларының есептері тыңдалды.

2025 жылдың 10 айында мұнай сервистік ұйымдар Маңғыстау облысындағы мұнай өндіру қарқынын сақтау мақсатында «Өзенмұнайгаз» бен «Маңғыстаумұнайгазда» бірқатар шараларды іске асырды. ММГ-де 76 ұңғыма бұрғыланып, 4311 ұңғымада жерасты жөндеу жасалды. Күрделі жөндеу жұмыстары ӨМГ-ның 591 және ММГ-ның 528 ұңғымасында жүргізілді. Сонымен қатар ММГ-де 120, ӨМГ-де 74 нысанда ұңғымаларды жайластыру жұмыстары орындалды.

Мұнай сервистік кәсіпорындар ММГ-ға тиесілі 109 шақырым құбырды күрделі жөндеуден өткізіп, ӨМГ-де 67 км мұнай және 19 км газ құбырын қайта жаңғыртты.

Жиын соңында Асхат Хасенов компанияларға операциялық тиімділікті арттыру, шығындарды оңтайландыру, техника мен жабдықтарды жаңарту, цифрландыру және автоматтандыру деңгейін көтеру, сондай-ақ қызметкерлердің әлеуметтік жағдайын жақсарту жөніндегі жұмыстарды жалғастыруды тапсырды.

Бүгін, 11:00