Өңірлерді дамытуға ден қойылады

Өңірлер өзіне тән ерекшелігіне сай дами түседі. Мәселен, мақта шаруашылығы орныққан оңтүстік Қазақстанда сәйкес саланы қаржыландыруға ден қойылады.

Мұнай-газ шикізатына бай батыс аймақ тиісінше мұнай-газ-химия өндірісін кеңейтеді. Егін, мал шаруашылығына бейімделген солтүстік, орталық облыстар сәйкесінше осы салаларды одан әрі күшейтеді. Сарапшылар Үкімет қабылдаған іс-қимыл жоспарының тиімділігін алға тартуда. Жалпы алдағы 5 жылға жоспарланған жобалардың барлығы өңірлерде іске асырылады, жергілікті экономиканың дамуына серпін беріледі деп күтілуде. 

Бауыржан Ғайса, «QAZTRADE» Сауда саясатын дамыту орталығы» АҚ бас директорының орынбасары:

- Бәйтерек холдингі жыл сайын бизнеске 1 млрд теңге тартатын қаржы институтының рөлін атқарады. Бұл біздің экономикамызға құйылатын қаржы. Экспортқа бағдарланған өндіріске инвестиция тартуға ден қоюымыз керек. Қытайдың ауыл шаруашылығы өнімдерін өңдеудің барлық сатысында тәжірибесі мол. Мәселен, егер ол инвестор бізге келсе, өндіріс ошағын ашып, тауарды үлкен нарықтарға экспорттай аламыз. Ал біздің 20 млн-дық  ішкі нарығымыз кез келген өндіріс үшін кішкентай. Сол себепті экспортқа бағдарланған өндіріс ел экономикасына қаржы құюдың құралы болмақ.

Ең төменгі жалақыны көтеру мәселесі қаралады

Айта кетейік, елде 2027-2028 жылдары ең төменгі жалақыны көтеру мәселесі қаралады. Ал келер жылдан бастап халықтың нақты табысының өсуі жылына орта есеппен 2-3%-дан төмен болмауы тиіс. Бұл шаралар да Үкіметтің, Ұлттық банктің және Қаржы нарығын реттеу және дамыту агенттігінің бірлескен іс-қимыл бағдарламасында қамтылған. Атаулы әлеуметтік қолдау тетіктері жетілдіріледі. Әлеуметтік төлемдердің ашықтығы үшін цифрлық технологияларды қолдануды кеңейту жоспарланып отыр.