Оңтүстік Корея инвесторлары Alatau city жобасына қалай қабылдады

Сирек металдардан ЖИ-ге дейін

Қанат Бозымбаев «Таңғы жұпар» елінде Alatau Rise with Kazakhstan форумының ашылуына қатысып, әлеуетті инвесторлар алдында Алатау қаласының жаңа жобасын таныстырды.

Alatau City-ді Қазақстан Үкіметі технологиялық компаниялар мен экспортқа бағытталған өндірістердің болашақ орталығы ретінде дамытуға мүдделі. Бұл қала инвесторларға қанатты қоғамдық көлік, сутегі экономикасы сияқты салаларда ынталандыру бағдарламаларын ұсынуға дайын.

Қанат Бозымбаев форумда сөйлеген сөзінде кореялық компаниялармен электроника, жаңартылатын энергетика, медицина, білім беру және қала сервистерін цифрландыру салаларында ынтымақ орнатудың әлеуеті зор екенін атап өтті.

Қазір Қазақстанда 800-ден астам корей компаниясы энергетика, құрылыс, қаржы, денсаулық сақтау, автомобиль өнеркәсібі және жоғары технология салаларында табысты жұмыс істеп жатқаны да айтылды. 2024 жылы Корея Республикасы Қазақстанның сауда серіктестері арасында 10-шы орынға, салған инвестициялар көлемі бойынша 3-ші орынға шықты.

— Біз бірлескен жобаларды одан әрі кеңейтіп, өнеркәсіп және энергетика салаларында кореялық компанияларды тартуға мүдделіміз. Сіздерді Alatau city ұлттық жобасына қатысуға шақырамыз, — деді Қанат Бозымбаев.

Вице-премьер бастаған қазақстандық делегация Оңтүстік Кореяның заң шығарушы, атқарушы органдары мен бизнес өкілдерімен екіжақты кездесулер өткізді. Келіссөздер аясында маңызды минералды шикізатты өндіру саласындағы бірлескен жұмыстан бастап жасанды интеллектті дамытуға дейінгі бағыттардың келешегі сөз болды. Осы кездесулердің бәрін Оңтүстік Кореядағы БАҚ-тың жан-жақты жазып жатқаны өзара байланысқа қызығушылық бар екенін көрсетсе керек.

Басты назар инновацияда

Оңтүстік Кореяның The Financial News газеті ірі Қазақстан делегациясының құрамында келген Үкімет өкілдерімен бірге ірі бизнес өкілдерін тізіп тұрып жазды.

Бұл материалда Alatau City қаласына инвестиция салатын Оңтүстік Корея компанияларына қандай мүмкіндіктердің есігі ашылатыны толық баяндалған.

— Біз Кореядан келетін барлық инновацияны құптаймыз, — деді Қанат Бозымбаев AJU Press-ке берген сұхбатында.

Сондай-ақ, ол жобаға АҚШ пен Қытайдан капитал тартылғанын айтты.

Қанат Бозымбаев Алатауды «крипто-қала» деп сипаттады, онда блокчейн мен цифрлық қаржы күнделікті өмірдің бір бөлігіне айналатынын айта келіп, сутегі энергетикасы ынтымақтастықтың ең перспективалы бағыты болатынын жеткізді.

— Doosan ұсынатын инновациялық технологиялар Алатау қаласында іске асып, әсіресе көгілдір және жасыл сутегі саласын белсенді қамтиды деп үміттенеміз, — деді вице-премьер.

AJU Press бұл мәліметтерді Қазақстан Үкіметі Оңтүстік Кореяның Samsung C& T, Hyundai E& C және Daewoo E& C сияқты компанияларын қала дамуының бастапқы кезеңіне тартуға ниетті екенін айтып толықтырады.

Өршіл жоба туралы батыл мәлімдеме

The Korea Times басылымы Қазақстан Alatau City жобасының арқасында Орталық Азиядағы инновациялар мен цифрлық қаржы орталығына айналуға ұмтылып жатқанын жазды.

«Мен кореялық инвесторлар мен қонақтарды осы өзара тиімді ынтымақтастықтың бір бөлігі болуға шақырамын. Korea Times материалында Қанат Бозымбаевтың осы сөзі берілді.

— Alatau city жобасы — жаңа сипаттағы қала ғана емес, ресурстарға тәуелді экономикадан инновациялар мен технологияларға негізделген экономикаға көшуді көздейтін батыл ұлттық мәлімдеме, — дейді Корея Демократиялық партиясының мүшесі Пак Хон Гын.

Сеул Алатауды қолдауға дайын

Yonhap ақпарат агенттігі жаһандық сауда болжап болмайтын өзгерістерді бастан кешіріп жатқан кезде екі елдің экономикалық ынтымақтастықты нығайту жолдарын талқылауы өте маңызды екенін жазды.

Корея тарапынан келіссөз жүргізген жауапты тұлғалардың бірі — Өнеркәсіп министрі Ким Чжон Гван. Ол екі елдің өндіріс саласындағы ынтымақтастығын кеңейтуді ұсынып, Қазақстанды оңтүстік кореялық компанияларды құрылыс жобалары мен маңызды минералдарды жеткізу тізбегіндегі тығыз ынтымақтастыққа қатыстыруға үндеді.

KBS World-тың жазғанына сүйенсек, Корея Қазақстанның Азия мен Еуропаны байланыстыратын халықаралық хабқа айналу жоспарын қолдау үшін жасанды интеллект саласындағы озық технологиялар мен аналитикалық білім ұсына алады.

Бұған дейін Alatau City-ді дамытатын жобаларға ақша салған инвесторлар 25 жылға салықтан босатылатынын жазған едік.