Оқушы тіл мүкістігі бар адамдардың сөзін түсінетін жүйені сынақтан өткізіп жүр

Алматылық мектеп оқушысы тілі мүкіс адамдардың сөзін түсінетін жүйені сынықтан өткізіп жүр.

Бүгін 16 жасар Үкілі Омарова жасанды зердемен жұмыс істейтін технологиясын дәрігерлерге таныстырды. Ол Soile AI (Сөйле ЭйАй) деп аталатын өнертабыстың мүмкіндігін алғаш рет медицинаның цифрлық трансформациясына арналған конференцияда көрсеткен еді.

Үкілі Омарованың Soile AI жүйесі былтыр IT-Fest-2024 стартап-сайысында жеңімпаз атанған. Одан кейін отандық және өзбекстандық денсаулық сақтау министрлігінің өкілдеріне де таныстырыпты. Оның айтуынша, өнертабысқа отбасындағы жағдай түрткі болған.

Үкілі Омарова, №22 мектеп-гимназияның 11-сынып оқушысы:

- Кішкентай кезімде атам инсульт алды. Сол кезде отбасымызбен оның сөзін түсіне алмайтынбыз. Кейін зерттеп көрсем, мұндай сөйлеу қабілетінің бұзылысына тап болған менің атам ғана емес, әлемде тағы сегіз жүз миллион адам бар екен. 

Ақылды жүйеге әзірге 6 тіл енгізіліпті. Жұмыс істеу тәсілі қарапайым. Ол тілі мүкіс адамның дауыстық хабарламасын талдап, түсінікті сөзге аударып береді. Үкілі бастаған жастар қазір сал болып қалған, инсульт алған адамдар арқылы Soile AI жүйесін дамытып жатыр.

Үкілі Омарова, №22 мектеп-гимназияның 11-сынып оқушысы:

- Мысалы, біздің Telegram-ботты көрейік. Пайдаланушы оны ашып, Start батырмасын басады. Тілді таңдайды. Сосын ауызша хабарлама жазады. Мысалы, бізде сал ауруына шалдыққан баланың шынайы аудиосы бар. Енді оның түсіндірмесін тыңдайық.

Александр Шин, ҚР ПІБ Медициналық орталығының реабилитолог-дәрігері:

- Инсульт алған, ДЦП диагнозы қойылған, сөйлеу бұзылысы бар адамдар бізге оңалтуға жиі келеді. Оқушылар әзірлеген бұл қосымша жұмысымызға жақсы көмектесер еді. Құрылғы мұндай пациенттермен жылдам байланыс орнатуға сеп болады.

Қазіргі таңда өнертабысты медициналық орталықтар сынақтан өткізіп жатыр. Дәрігерлер Үкіліге тілінде мүкісі бар адамдардың дауыс қорын жинауға көмектесуде. Себебі жүйе мінсіз жұмыс істеу үшін миллион адамның аудио жазбасын зерттеу керек. Үкілі Омарованың айтуынша, болашақта бұл құрылғы логопедтерге немесе сөйлеу қабілеті бұзылған адамдарға көмекші болады.

Аршын Кемелжан, Валентин Лобанов