Орталық Азия сараптамаларын әлемдік зерттеу қауымдастықтармен біріктіретін платформа іске қосылды

- Қазақстан бүгінде тек саясат пен экономика емес, идеялар мен білімнің орталығына айналып келеді. Биыл біз Astana Think Tank Forum-ды екінші жыл қатарынан өткізіп отырмыз. Бүгінгі күрделі халықаралық жағдай форумның өзектілігін айқындап отыр десек болады. Сондықтан мұнда айтылатын әрбір ой мен ұсыныс жаһандық өзара түсіністік пен сенімге өз үлесін қосады деп сенемін. Қазақстан бүгінгі таңда орта державалар арасында көптеген өзекті мәселе бойынша көзқарасы мен бастамаларын ұсына алады. Сондықтан да, осы форум арқылы біз сенімге, ашық пікірталасқа және нақты шешімдерге негізделген алаңды ұсынып отырмыз, - деді ҚР Президенті жанындағы Қазақстанның стратегиялық зерттеулер институтының директоры Жандос Шаймарданов.

Институт басшысы Astana Think Tank форумы идеяларды ынтымақтастықты, ал сараптамаларды іс-қимылға айналдыру мақсатында құрылғанын баса айтты.

- Бұл рәсімдік іс-шара емес. Бұл – сарапшылар, саясаткерлер мен серіктестер өз идеяларын тексеріп, болжамдарға күмән келтіре алатын, іс жүзіндегі шешімдерді бірлесіп әзірлейтін жұмыс форумы. Биыл біз Орталық Азия сараптамаларын әлемдік зерттеу қауымдастығымен біріктіретін жаңа цифрлық InsightsCentral.Asia платформасын қосу арқылы алға қарай маңызды қадам жасаймыз, - деді ол.

Айта кетейік, ҚР Президенті жанындағы Қазақстанның стратегиялық зерттеулер институты ұйымдастырған іс-шараға әлемнің 20 елінен 40-қа жуық шетелдік сарапшы, жетекші «ақыл-ой орталықтарының» басшылары мен зерттеушілері қатысып жатыр. Форум аясында өтетін 9 тақырыптық сессияда әлемдік саясат пен халықаралық қатынастардың негізгі бағыттары талқыланбақ.

Айта кетейік, Digital Bridge-2025 халықаралық технологиялық форумында қазақстандық және шетелдік әлеуеті зор жобалар көрмесі өтті.