Орталық Азиядағы ең ірі: Шымкентте ұшақтарға қызмет көрсететін нысанның құрылысы басталды

АСТАНА, 28 ақпан – Sputnik. Шымкентте әуе кемелеріне техникалық қызмет көрсетуге арналған Орталық Азиядағы ең ірі орталықтың құрылысы басталды, деп хабарлады көлік министрлігі.

Нысан SCAT авиакомпаниясы мен Boeing компаниясының серіктестігі аясында жүзеге асырылып жатыр. Бүгін авиациялық техникаға техникалық қызмет көрсету және жөндеу жөніндегі ангарлық орталықтың (MRO) құрылысына капсула салудың салтанатты рәсімі өтті.

"Жоба Boeing өндірісіндегі әуе кемелеріне қызмет көрсетуге бағытталған толық өндірістік циклді заманауи орталық құруды көздейді. Атап айтқанда, Boeing 737 (Classic/NG/MAX), Boeing 757/767, сондай-ақ Boeing 777 кең фюзеляжды әуе кемелеріне техникалық қызмет көрсету және болашақтағы перспективалы бағдарламаларды іске асыру жоспарланып отыр", - деп жазылған хабарламада.

Осыған байланысты қосымша Boeing әуе кемелерін сатып алу мүмкіндігі де қарастырылуда.

Кешен 10 гектар аумақта орналасады. Инженерлік-техникалық инфрақұрылымның жалпы ауданы 45 000 шаршы метрден асады, оның ішінде ангар маңындағы 6 гектардан астам әуе кемелерінің тұрақ аймағы бар. Жалпы саны кемінде 15 жоғары технологиялық нысан салу жоспарланған.