Өзбекстан Ирандағы отандастарын Түрікменстан аумағы арқылы шығарады

Dunyo ақпарат агенттігінің мәліметінше, Өзбекстанның Ашхабад пен Тегерандағы елшіліктерімен тығыз байланыста жұмыс жүріп жатыр.

Дипломаттар Түрікменстан мен Иранның шекарасында орналасқан Серахс қаласында отандастарын күтіп алады. Оларды әрі тасымалдау үшін арнайы көліктер қарастырылған.

Еске салсақ, бұған дейін Өзбекстанның Сыртқы істер министрлігі қажылық, демалыс және басқа да мақсатта Таяу Шығыс елдеріне баруға ниетті азаматтарға сапарларын кейінге шегеруді ұсынды.

Сонымен, 28 ақпанда Израиль Иранға соққы жасады. Сол күні Иран Израильге қарымта жауап ретінде бірнеше зымыран жіберді.

Кеше Иранның IRNA мемлекеттік ақпарат агенттігі елдің Жоғарғы көшбасшысы аятолла Әли Хаменеи қаза тапқанын хабарлады. Бұған қоса, Әли Хаменеидің кеңесшісі - Иран Қорғаныс кеңесінің хатшысы Әли Шамхани мен Ислам революциясы сақшылары корпусының қолбасшысы Мохаммад Пакпур көз жұмды.

Кейін Аятолла Арафи Иранның уақытша Жоғары жетекшісі болып тағайындалды.

Бүгін АҚШ президенті Дональд Трамп Иранға қарсы әскери операция қойылған міндеттер толық орындалғанға дейін жалғасатынын хабарлады.

Мұнымен бірге, Таяу Шығыстағы тұрақсыздық салдарынан мұнай бағасы көтеріліп, акциялар құлдырады.