Павлодар облысында балық инспекторлары жетіспейді

Павлодар облысының аумағында балық ресурстарын қорғау, өсімін молайту және пайдалану саласындағы мемлекеттік бақылау мен қадағалауды «Зайсан-Ертіс облысаралық бассейндік балық шаруашылығы инспекциясы» РММ-нің өңірлік балық инспекциясы бөлімі жүзеге асырады. 

— Павлодар облысы бойынша балық инспекциясы бөлімінде жалпы саны 8 мемлекеттік инспектор бар. Мұншама қызметкер саны облыстағы су айдындарын толықтай бақылауға алуға жеткіліксіз екені рас. Бір инспекторға шамамен 2-3 бақылау ауданы тиесілі. Бұл жағдай мемлекеттік инспекторға белгілі бір көлемде жүктеме түсіріп отыр, — деп хабарлады Kazinform тілшісіне «Зайсан-Ертіс облысаралық бассейндік балық шаруашылығы инспекциясы» РММ-нің Павлодар балық инспекциясынан.

Инспекция мамандарында 6 автокөлік, 1 қызметтік катер, қуаты 60 ат күшіне ие аспалы моторы бар 1 патрульдік катер, моторлы 1 үрлемелі қайық және 1 квадрокоптер (дрон) бар.

— Уәкілетті органның ведомствосымен материалдық-техникалық жағдайды жақсарту мақсатында тиісту жұмыстар жүргізіліп жатыр, — деп атап өтті инспекциядан.

Облыс аумағында көлемі 72 мың гектардан асатын Ертіс өзені, 14,5 мың гектарды құрайтын Қ.Сәтбаев атындағы канал бар. Одан бөлек өңір аумағында 120 су айдыны орналасқан. Олардың барлығында тиісті кезеңдерде балық аулауға болады.

Бұған дейін Павлодар облысының далалы жерлеріндегі тұщы су айдындарында, Ертіс өзенінде және оның жайылмалы су айдындарында 15 сәуір — 30 мамыр аралығында балықтың кез келген түрін аулауға уақытша тыйым салынатынын жазғанбыз.