Павлодарда 20 ға жуық адамды кене шаққан

Өңірде кене шаққан адамдар қатары көбейе түскен. Сәуір айының басынан 19 адамды шаққан. Бұл өткен жылдың ұқсас кезеңімен салыстырғанда екі есе көп.

- Биыл көктем ерте шықты. Тіпті +5...+7 градус шамасындағы температураның өзі кенелер үшін қолайлы. Сондықтан олар осы кезеңде белсенді бола түседі. Әр адам өз қауіпсіздігі үшін сақтық шараларын сақтағаны жөн. Мәселен, табиғатқа шығар алдында денені толық жабатын киім кию керек. Сонымен қатар адамдар бір-бірін тексергені маңызды, өйткені бұл кенені дер кезінде байқап, киімнен алып тастауға мүмкіндік береді. Мұндай тексеруді әр 1-1,5 сағат сайын қайталап отырған дұрыс. Оған қоса, репелленттерді қолданған абзал. Бұл химиялық құралдар тек маса ғана емес, кенелерден де қорғануға мүмкіндік береді, - дейді облыстық санитариялық-эпидемиологиялық бақылау департаментінің бас маманы Шахизада Тұрлыбаева.

Дәрігерлердің айтуынша, кене шаққанда адам бойында дене қызуының көтерілуі, әлсіздік, сырқырап ауыру, бұлшықеттегі ауырсыну сияқты белгілер байқалады. Вирустық энцефалит кезінде жүрек айнуы, құсу сияқты шағымдар да болуы мүмкін. Ал инфекция берілсе лимфа түйіндері ұлғайып, денеде бөртпелер пайда болады. Кене энцефалиті соңғы рет аймағымызда өткен жылы тіркелген. Биыл әзірше ондай дерек тіркелген жоқ.

Еске сала кетейік, Қызылорда облысында кенеге қарсы өңделетін елді мекендер саны азайды.