Павлодардағы әлеуметтік баспананың сапасы сын көтермейді

Павлодар қаласында әлеуметтік аз қамтылған және көпбалалы отбасыларға берілген баспананың сапасы сын көтермейді.

Тұрғындардың сөзінше, жаңа тұрғын үйдегі пәтерлердің қабырғасы көгеріп кеткен. Оған қоса, жарық пен су да жиі өшеді екен. Тұрғындар біздің телеарна тілшілеріне түйіткілді мәселенің түйінін тарқатуға көмек сұрап хабарласқан болатын. Жұртшылықтың талап-тілегін әріптесім тыңдап қайтты.

Наурыз айының соңында баспаналы болған павлодарлық 19 отбасы бөркін аспанға лақтыра қуанған еді. Бірақ ол қуаныштары ұзаққа созылмады. Бір ай өтпей жаңа үйлерден ақау шығып, тұрғындарды әбден әбігерге салған. Пәтердегі ылғалдылықтан балалар да жиі ауырады.

Мария Головко, Павлодар қаласының тұрғыны:

- Қазір екі балам ауруханада жатыр. Екеуі үйде ем алауда. Қызым мүлдем орнынан тұра алмайды. Қазір пәтердегі қабырғалар көгеріп, ылғал болып тұр.

Ксения Толкачёва тұратын пәтердің де қабырғасы сыз тартып көгеріп кеткен. Терезе үнемі терлеп тұрады. Еден суық, төбеден жел ұйытқиды. Жығылғанға жұдырық болып, су мен жарық та жиі өшеді.

Ксения Толкачёва, Павлодар қаласының тұрғыны:

- Қатты жел, жаңбыр жауса жарық өшіп қалады. Жарық сөнсе суымыз да тоқтайды. Судың сапасы өте нашар. Дәмі кермек татыған тіршілік нәрін мүлдем тұтына алмаймыз.  

Ал жергілікті жауаптылар барлық мәселеден хабардар. Олар анықталған кемшіліктерді мердігер ұйым қалыпқа келтіретінін жеткізді.

Мақпал Қаржаубай, Павлодар қаласы әкімінің баспасөз хатшысы:

- Павлодар қаласының құрылыс бөлімі және тұрғын үй қарым-қатынастар бөлімі, мердігер ұйым осы үйлерге барып, комиссиялық тексеру жүргізген. Ақаулар бойынша актісін құраған. Қазіргі уақытта мердігер ұйым ақауларды түзету жұмыстарын жүргізіп жатыр. 

Иә, қазір мердігер кемшіліктерді жою жұмыстарын бастап кетті. Жауаптылар жақында барлық мәселе шешіледі деп сендірді.

Абзал Азаматұлы, Валентина Леонова, Даулет Кошкарбаев, Марат Игликов