Павлодарлық қария алаяқтарға 8,5 млн теңгесін беріп жібере жаздады

АСТАНА, 23 желтоқсан – Sputnik. Павлодар облысында қырағы такси жүргізуші зейнеткер әйелді алаяқтардан құтқарды, - деп хабарлайды Polisia.kz.

Қария есептегішті тексеру және пломбалау жүргізіледі деген сөзге сеніп, сілтеме арқылы өтіп қылмыскерлерге 8,5 млн теңге бермек болған.

"Зейнеткерге қоңырау шалып, өздерін энергокомпания қызметкері ретінде таныстырған. Есептегішке тексеру жүргізу үшін сервистен келген кодты айтуды ұсынған. Әйел аталған кодты хабарлаған. Арада біраз уақыт өткен соң оған өзін банк қызметкері ретінде таныстырған белгісіз тұлғалар хабарласып, оның ақшасын алаяқтар иемденбек болып жатқанын айтқан", - дейді полиция.

Қаражатты "қауіпсіз шотқа" аудару қажеттігін, сол күні курьер ақшаны алып кететіні де айтылған.

Зейнеткер есепшотынан 8,5 млн теңге шешіп, нұсқаулық бойынша таксимен жеткізбек болған.

"Кешкі уақытта маған бір "сәлемдемені" алып кету жөнінде тапсырыс түсті. Жөнелтуші жасы үлкен әжей екен. Не беріп жатқанын, кімге тапсыратынын сұрағанымда, нақты жауап бере алмады, қатты абыржып тұрды. Күдіктеніп, қарияны отырғызып, полиция пунктіне апардым", — дейді жүргізуші.

Алаяқтық фактісі бойынша қылмыстық іс қозғалып, күдіктілерді анықтау және ұстау бағытында жедел іс-шаралар жүргізіл жатыр, дейді облыстық полиция.