Перуде кейінгі 10 жылда жетінші президент ауысты

Президент ретіндегі алғашқы сөзінде Хосе Хери елдегі қылмыспен күресуге және сайлауды әділ өткізуге уәде берді. 

Ол жеке басына қатысты айыптаулардан кейін президенттік қызметінен шеттетілген Дина Болуартенің орнына келді. 

Болуартенің қарсыластары оны «үнемі өз жұмысын орындауға моральдық тұрғыдан қабілетсіз» деп айыптады. 

Тұңғыш әйел президент

Болуарте 2022 жылдың соңында президенттік билікке келіп, ел тарихында бұл лауазымды атқарған алғашқы әйел болды. Бұған дейін ол бұрынғы көшбасшы Педро Кастильо кезінде вице-президент қызметін атқарған. 

Оның да президенттік мерзімі сыбайлас жемқорлықты айыптаудан және еркін сайлауды талап еткен жаппай наразылықтардан басталған. Билік шеруге шыққандарды күшпен басып, соның салдарынан 69 адам қаза тапқан еді. Ал Болуарте отставкаға кетуден бас тартты. 

Өткен жылы жергілікті La Encerrona басылымы Болуартеде қымбат сағаттар коллекциясы бар екенін хабарлаған, олардың қатарында құны 6-14 мың долларға дейін жететін Rolex те жүр. Ал оның президенттік жалақысы – 11 000 доллар. 

Былтыр Болуарте жалақысын көтеру туралы шешім қабылдағаннан кейін тағы бір жемқорлық дауы ушыққан.

Отставкалар, айыптаулар және 5 күнге созылған билік

2016 жылдан бері Перуде 7 президент ауысты және осы уақытқа дейін олардың ешқайсысы толық өкілеттігін атқарған жоқ. Олардың бірі Мануэль Мерно 2020 жылы 5 күн ғана билік басында болды. 

Перу президенттерінің көбі сыбайлас жемқорлық пен біліксіздігіне қатысты айыптауларға байланысты қызметінен шеттетілген. Елде президент пен Конгресс арасындағы келіспеушіліктер де жиі болып тұрады. Өйткені Перу Конституциясы парламентке президентті «моральдық қабілетсіз» деген айыппен қызметінен босатуға құқық береді. Бұл түсініксіз тұжырым билік жолындағы күресте қолдануға әбден қолайлы болып тұр. 

Жаңа сайлау келесі жылдың сәуіріне жоспарланған.

Айта кетейік, бұған дейін Перу конгресі қауіпсіздік дағдарысына байланысты президент Дина Болуартеге импичмент жариялауға дауыс бергенін хабарлағанбыз.