Полиция тараздықтарға мас күйде көлік айдаудың қаупін виртуалды әлемде көрсетті

Тараз қаласында полиция қызметкерлері түсіндіру жұмыстарының жаңа форматын енгізіп, елімізде алғаш рет жолдағы қауіп-қатерлерді VR-технологиялар арқылы көрсетуді ұйымдастырды. Жоба жүргізушілердің құқықтық мәдениетін арттыруға және жолда қауіпсіз мінез-құлық дағдыларын қалыптастыруға бағытталған.

Арнайы көзілдіріктің көмегімен қатысушылар интерактивті режимде жол қозғалысы ережелерімен, тас жолдағы модельденген жағдайлармен және алкогольдік масаң күйдегі жүргізушінің сезімдерімен танысты. Виртуалды симуляция жол жағдайының «ішіне еніп кеткендей» әсер қалдырды: бейне бұлыңғырланып, қимыл-қозғалыс үйлесімі бұзылып, реакция баяулап, басқа көліктерге дейінгі арақашықтықты қабылдау бұрмаланды.

Қатысушылардың айтуынша, тіпті қауіпсіз цифрлық сценарийдің өзі алаңдаушылық пен абыржуды тудырған. Бұл рөлде отырып жасалған кез келген қате әрекеттің қаншалықты қауіпті екенін түсінуге мүмкіндік берген. Әсіресе жол-көлік оқиғасының виртуалды моделі ерекше эмоциялық әсер қалдырып, ережені бұзудың салдарын айқын көрсеткен.

Іс-шараға жас жол инспекторларының жасақтары да қосылды. Олар қала тұрғындарын Жол қозғалысы ережелерін қатаң сақтауға және жолда мұқият болуға шақырды.

Еске сала кетсек, Маңғыстау полициясы бастығы мен дәрігер ұшақта шетел азаматын құтқарғанын жаздық.