Полис, өтініш және төлемдер онлайн Қазақстанда автосақтандыру қалай өзгереді

Қазақстанда автосақтандыру жүйесін цифрландыру жоспарланып отыр, деп хабарлайды Tengri Auto Қаржы нарығын реттеу және дамыту агенттігіне (ҚНРДА) сілтеме жасап.

"Сақтандыру нарығын дамытудың 2030 жылға дейінгі бағдарламасы" жобасына сәйкес, сақтандыру компанияларының клиенттерін қағазбастылықтан және сақтандыру төлемдерін алу үшін кеңселерге барудан босату көзделіп отыр.

Ұсыныстардың бірі - электрондық құжаттарға қойылатын бірыңғай талаптарды белгілеу. Сақтандырудың жаппай түрлері үшін электрондық шарт негізгі форматқа айналуы тиіс.

Полисті онлайн ресімдеуге, содан кейін сол жерде сақтандыру жағдайы туралы хабарлауға, құжаттарды жіберуге және төлем алуға болады.

Қазіргі уақытта БСД (Бірыңғай сақтандыру дерекқоры) тек деректер базасы ретінде пайдаланылады. Болашақта оны сақтандыру компаниялары деректермен қауіпсіз алмаса алатын жүйеге айналдыру жоспарланған.

БСД міндетті сақтандырудың барлық шарттары бойынша бірегей нөмірлер беретін болады.

"Бұл сақтандыру жағдайларын реттеудің ашықтығын қамтамасыз етеді. Ортақ стандарттар мен API-ді қолдану деректер сапасын арттыруға және нарық қатысушылары арасындағы өзара іс-қимылды жеңілдетуге мүмкіндік береді. Осының негізінде күдікті сақтандыру жағдайлары мен стандартты емес мінез-құлықты автоматты түрде анықтау құралдарын енгізу жоспарланып отыр", - деп атап өтті агенттік өкілдері.

Болашақта сақтандыру компаниялары, банктер және цифрлық сервистер клиенттің келісімімен деректер алмаса алады.

"Сақтандыру маркетплейстері мен цифрлық платформалар үшін бірыңғай ережелер пайда болады. Олардың көмегімен тұтынушы сақтандыру шарттары мен құнын салыстырып, өз сұранысына барынша сәйкес келетін сақтандыру шешімін таңдай алады", - деп түсіндірді ҚНРДА-да.

Мұның бәрі сақтандыру қызметтерін алуды жеңілдетуге бағытталған. Адам полисті онлайн таңдап, сатып ала алады, сақтандыру жағдайы туралы хабарлап, төлемді де қашықтан алады. Бұл уақыт пен шығынды үнемдеуге, ал процестің өзін түсінікті етуге көмектеседі.

Еске сала кетейік, Қазақстанда 2024 жылдан бастап "Еурохаттама" қолданыста, ол арқылы шағын жол-көлік оқиғасын (100 АЕК-ке дейін) полиция шақыртпай және сотқа бармай-ақ ресімдеуге болады. Жүргізушілер төлем алу үшін құжаттарды жеңілдетілген тәртіппен тапсыра алады.

Бұл апатты ресімдеу уақытын қысқартып, қатысушыларды қағазбастылықтан құтқарады.

2026 жылғы 1 қаңтардағы жағдай бойынша "Еурохаттама" іске қосылған сәттен бастап жалпы сомасы 4,9 миллиард теңгеге 25 мың сақтандыру ісі қаралған.

Google News арқылы жаңалықтарымызды қадағалаңыз