​Польша Президенті Зеленскийді елдің жоғары марапатынан айырғысы келеді

Польша Президенті Кароль Навроцкий Украина Президенті Владимир Зеленскийді Польшаның жоғары мемлекеттік марапаты — Ақ Бүркіт орденінен айыруға қол жеткізуге ниетті.

Бұл туралы Onet хабарлайды.

Бұған Украина Қарулы Күштерінің (УҚК/ВСУ) элиталық бөлімшелерінің біріне «УПА батырлары атындағы» құрметті атауды беру туралы шешім себеп болды.

Ақ Бүркіт орденін Зеленскийге 2023 жылдың сәуір айында Польшаның сол кездегі Президенті Анджей Дуда табыс еткен болатын.

Навроцкий 8 маусымда Ақ Бүркіт ордені капитулының отырысы өтетінін, онда Украина лидерін осы марапаттан айыру мәселесін күн тәртібіне енгізуді ұсынатынын мәлімдеді.

«Мен күн тәртібіне Украина Президенті Владимир Зеленскийді орденнен айыру туралы мәселені енгізуді ұсындым», — деді Навроцкий.

Польша Президентінің айтуынша, Зеленскийдің УҚК бөлімшесіне УПА-мен байланысты атау беру туралы шешімі қателік болды.

Ол өз мәлімдемесінде бұл қадамы арқылы Украина басшысы «ресейлік насихатқа (пропагандаға) тамаша материал және ойлануға көп азық берді» деп есептейді.

«Мен бұл шешімді өте сыни тұрғыдан бағалаймын», — деді Навроцкий.

УПА Степан Бандера бастаған Украина ұлтшылдары ұйымының әскери қанаты болған еді. Польшаның тарихи жадында УПА-ның қызметі Екінші дүниежүзілік соғыс жылдарындағы поляк халқын жаппай қыру оқиғаларымен байланысты.

Бүгін, 17:04