Премьер министрдің Алматыға жұмыс сапары

Мемлекет басшысының атом саласының ғылыми базасын дамыту жөніндегі тапсырмасы бар.

Премьер-министр Олжас Бектенов Алматыдағы жұмыс сапары барысында осы бағытта атқарылып жатқан жұмыстармен танысты. Атом саласындағы ғылыми, қолданбалы және жоғары технологиялық бағыттарды дамыту жөніндегі тапсырмалардың орындалу барысын тексерді. Негізгі міндет – зерттеу инфрақұрылымын қалыптастыру және саланың ғылыми-технологиялық әлеуетін нығайту. Сондай-ақ үкімет басшысы  «Алатау» инновациялық технологиялар паркі» арнайы экономикалық аймағында болды.

Ядролық физика институты жаңа буын ядролық реакторларын және термоядролық қондырғыларға арналған материалдарды сынаумен айналысады. Ядролық технологияларды өнеркәсіпте, ғылыми зерттеулерде қолданады. Медицинада онкологиялық ауруларды диагностикалауға  және радиофармпрепараттар өндірісінде пайдаланады. Бүгінгі таңда ол жерде 11 базалық эксперименттік қондырғы жұмыс істейді.

Асхат Бекбаев, Ядролық физика институты бас инженерінің орынбасары:

- Бүгінгі таңда біз жартылай бағалы тас топазды сәулелендірумен айналысып жатырмыз. Тапсырыс беруші - шетелдік. Қазіргі уақытта реактор  95%-ке  толып тұр. Бұл кадрларды даярлау жан-жақты болатынын, болашақта барлық бағыттарды қамтитынын көрсетеді. Қазірдің өзінде ұлттық жоғары оқу орындарымен бірлесіп кадр даярлау жұмыстары жүргізілуде. Жыл сайын реактор базасында шамамен 25–30 адам тәжірибеден өтеді.

Евгений Ермаков, Ядролық физика институты өндіріс жөніндегі бас директорының орынбасары:

- Қазіргі уақытта біздің институт 3 радиофармацевтикалық препарат шығарады. Алғашқысы ол қатерлі ісіктің ерте кезеңін диагностикалау және онкологиялық ауруларды бақылау үшін қолданылады. Екінші препарат – йод-131 радиоизо тобы негізіндегі натрий йодид, ол қалқанша безі қатерлі ісігін емдеуде пайдаланылады. Үшінші препарат жүрек-қан тамырлары ауруларын, онкологиялық ауруларды, сүйек метастаздарын және басқа да ауруларды диагностикалау үшін қолданылады.

Үкімет басшысы «Алатау» инновациялық технологиялар паркі» арнайы экономикалық аймағында болып, жоғары технологиялық өндірістерді дамыту және  инфрақұрылымды кеңейту мақсатында жүргізіліп жатқан жұмыстарымен танысты. Мұнда резиденттер  399 млрд теңге инвестиция салған.  Бүгінгі таңда  құны 265 млрд теңге болатын  24 жоба жүзеге асырылып жатыр.

Ерлан Нәбиев, Nero group ЖШС құрылтайшысы:

- Арнайы экономикалық аймақтың алаңында осы жоғары технологиялық кәсіпорынды құрдық. Бұл жобаға шамамен 2,4 млрд теңге инвестиция салынды. Бүгінгі таңда барлық энергия ресурстарын қамтитын есептегіш құралдардың өндірістік желі жолға қойылған. Атап айтқанда, бұл жылу, су, электр энергиясы және газ. Біздің барлық аспаптар деректерді қашықтан беру қызметімен жабдықталған.

Сондай-ақ Премьер-министрге робототехника өнімдерін шығару, ұшқышсыз жүйелерді дамыту және дуалды оқыту элементтері бар ғылыми-білім беру кластерін құру жобалары таныстырылды. Олжас Бектеновтің айтуынша, мұндай алаңдарды дамыту Президент жариялаған Цифрландыру және жасанды интеллект жылы аясында ерекше маңызға ие.

Авторлары: Қарлығаш Қайыпбекова, Радик Жакупов