Press TV: Иран АҚШ тың соғысты тоқтату туралы жоспарынан бас тартты

-Иран АҚШ ұсынысына теріс жауап берді, — деп мәлімдеді телеарна.

Тегерандағы үкімет өкілінің айтуынша, «соғыс АҚШ президенті Дональд Трамп қалаған кезде емес, Иран шешім қабылдаған кезде ғана аяқталады».

AFP: жоспар Иранға Пәкістан арқылы жеткізілген

Ислам Республикасына АҚШ-тың 15 тармақтан тұратын жоспары «Пәкістан арқылы» жеткізілгенін AFP агенттігі Исламабадтағы екі үкімет өкіліне сілтеме жасап нақтылады.

The New York Times басылымының жазуынша, жоспар Ормуз бұғазы арқылы кеме қатынасын қалпына келтіруді, сондай-ақ Иранның ядролық бағдарламасына қатаң шектеулер енгізуді қарастырады. Өз кезегінде израильдік Channel 12 телеарнасының мәліметінше, оның орнына Иранға қарсы санкциялар алынуы тиіс. Құжатқа сәйкес, тараптар бір айлық бітім жариялап, осы кезеңде Вашингтонда АҚШ ұсынысы негізінде келіссөздер жүргізуі керек. Жоспарда Ирандағы билікті ауыстыру қарастырылмаған.

Лондон Ормуз бұғазы бойынша коалиция құрмақ

Осы ретте Ұлыбритания мен Франция Ормуз бұғазы арқылы кеме қатынасын қайта бастау мәселесі бойынша келіссөздер ұйымдастыруды жоспарлап отырғаны белгілі болды. Ұлыбритания Қорғаныс министрлігіндегі дереккөздің AFP-ге хабарлауынша, шамамен 30 елдің әскери өкілдері қатысатын кездесу апта соңына дейін өтуі мүмкін. Негізгі мақсат — бұғазды ашу үшін коалиция құру.

Өткен аптада Ұлыбритания, Франция, Германия, Италия, Жапония және Нидерланд «қауіпсіз өтуді қамтамасыз ету үшін тиісті шаралар қабылдауға» дайын екенін мәлімдеді. Кейін бұл бастамаға тағы 24 ел қосылған.

- Бұл коалицияны біріктіруде маңызды рөл атқарып отырғанымызды түсінеміз, — деді Ұлыбритания Қорғаныс министрлігінің өкілі.

The Times газетінің мәліметінше, Лондон кездесуді Портсмутта немесе Лондонда өткізуге ұсыныс жасаған.

БҰҰ Бас хатшысы арнайы өкіл тағайындады

Сонымен қатар БҰҰ Бас хатшысы Антониу Гутерриш Ирандағы соғысты реттеу үшін арнайы өкіл тағайындады. Француз дипломаты Жан Арно осы бағытта ұйым атынан жұмыс жүргізеді.

-Бұл соғыс бақылаудан шығып кетті, — деді Гутерриш.

Ол АҚШ пен Израильді әскери әрекеттерді тоқтатуға шақырып, Ираннан Парсы шығанағындағы елдерге жасалатын шабуылдарды доғаруды талап етті. Бұған дейін Жан Арно БҰҰ-ның Ауғанстан, Колумбия және Боливиядағы өкілі қызметтерін атқарған.

WSJ: Иранның жаңа талаптары

Бұған дейін The Wall Street Journal басылымы дереккөздерге сүйене отырып, Тегеранның АҚШ-пен ықтимал келіссөздер алдындағы жаңа талаптарын жариялаған болатын. Олардың қатарында — Парсы шығанағындағы барлық америкалық базаларды жабу, АҚШ пен Израильдің Иранға жасаған соққылары үшін өтемақы төлеу, сондай-ақ Ормуз бұғазы арқылы өтетін кемелерден ақы алу талаптары бар.

Сонымен қатар Иран санкцияларды толық алып тастауды, ядролық бағдарламасын толық сақтауды, соғыстың қайта басталуына жол бермейтін кепілдіктерді және Ливандағы «Хезболла» тобына қарсы шабуылдарды тоқтатуды талап етеді.

23 наурыз күні Дональд Трамп Иран басшылығымен «өнімді келіссөздер» өткенін мәлімдеді. Ол сондай-ақ Иранның энергетикалық инфрақұрылымына соққы жасауды бес күнге тоқтата тұру туралы тапсырма берген. Алайда Тегеран келіссөздер болғанын жоққа шығарып, «ондай келіссөздер болған жоқ және жоқ» деп мәлімдеді.

Қазіргі таңда Ормуз бұғазы арқылы әлемдік мұнай мен сұйытылған газ қорының шамамен 20 пайызы тасымалданатын негізгі бағыттағы қозғалыс Таяу Шығыстағы соғыс жағдайына байланысты іс жүзінде толық тоқтаған.

АҚШ пен Израильдің Иранға қарсы соғысы

28 ақпаннан бастап АҚШ пен Израиль Иран аумағына әуеден соққы жасап келеді. Соның салдарынан Иранның жоғарғы көшбасшысы аятолла Әли Хаменеи мен бірқатар жоғары лауазымды шенеунік пен күштік құрылым өкілдері қаза тапқан.

Иран бұған жауап ретінде Парсы шығанағындағы көрші мемлекеттерге зымырандар мен дрондар арқылы соққы жасап жатыр. Ислам Республикасының мәлімдеуінше, негізгі нысана — аймақтағы америкалық әскери базалар. Сонымен қатар бірқатар елдегі мұнай қоймалары мен мұнай танкерлері де шабуылға ұшыраған. Соғыс басталғалы Иран шабуылдарынан Әзербайжан мен Еуроодаққа уақытша төрағалық етіп отырған Кипр де зардап шеккен.

Ал осы уақытта Куба әскері АҚШ тарапынан болуы мүмкін агрессияға дайындалып жатыр