Президент кеңесшісі Мәлік Отарбаев Абай университеті студенттерімен жасанды интеллект дәуірі тақырыбында кездесу өткізді

Бүгін Қазақстан Республикасы Президентінің кеңесшісі Мәлік Отарбаев Абай университетінің белсенді студенттерімен кездесті, – деп хабарлайды Aikyn.kz сайты.

Оның басты мақсаты – Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауында көтерілген мәселелерді түсіндіру және ондағы айтылған айқын бағдарларды насихаттау. Жылы жүздесу барысында емен-жарқын әңгіме болды.

Президент кеңесшісі Жолдау бойынша жылдың аяғына дейін Қазақстан жоғары оқу орындарын түгел дерлік аралып шықпақ. ЖОО студенттерімен ең бірінші кездесуді еліміздегі тұңғыш университеттен бастауының өзінде символикалық мән бар. Өйткені, ұлтымыздың ұлы тұлғалары бастауында тұрған Абай университеті 1928 жылы ең алғашқы ашылған жоғары оқу орыны. Сонымен қатар, Орталық Азия мен Қазақстандағы педагогикалық бағыттағы көшбасшы университет. Қасиетті қара шаңырақтан түлеп ұшқан түлектер педагог ретінде ертеңгі күні мемлекеттің іргетасын нығайтуда маңызды рөл атқарады.

«Мен де студент болғанмын. Ал осындай құндылығы жоғары Абай университетінің студенті болу – сіздер үшін үлкен мәртебе» деді Мәлік Нұржанұлы.

Жолдаудың жастар үшін аса көп мүмкіндік беретін тетіктері туралы баяндаған М.Отарбаев Қасым-Жомарт Кемелұлының «Мен алдымызға өте маңызды стратегиялық мақсат қойдым. Қазақстан үш жыл ішінде міндетті түрде жаппай цифрлық ел болуы керек. Біз жаппай цифрландыру және жасанды интеллект технологиясын барынша енгізу арқылы экономиканы жаңғыртуымыз қажет» деп айтқан сөзінің астарында жатқан үлкен стратегиялық қадамдар жатқанын айқындап берді.

Қазір қоғамды жасанды интеллект (ЖИ) мәселелеріне байланысты талай-талай толғамды ойлар әрі-сәрі күйге түсіріп жүргені белгілі. Оны Президент кеңесшісі жоққа шығарып, жасанды зерде тек құрал болуы керек екенін еске салды. Бұл өз кезегінде студенттер тарапынан зор қызығушылық туындатты.

Олар болашақ педагог ретінде «ЖИ-мұғаліммен қандай да бір бәсекелестік туындауы мүмкін бе?» деген өзекжарды сұрақтарын қойды. Оған қатысты «Әрине, заманауи педагогтың білігі жоғары болғаны жөн, бірақ ЖИ ұстаз беретін адами ілімді ешқашан бере алмайды» деген жауап берілді.

Өз сауалдарын еркін әрі жан-жақты қойған студенттер өздерін мазалаған күрделіліктерге нақты-нақты мысалдармен жауап алып, Президент кеңесшісі Мәлік Отарбаев пен Абай атындағы ҚазҰПУ Басқарма төрағасы-ректор Болат Тілептің Жолдау туралы, бүгінгі күн тәртібіндегі жастарды қызықтыратын тың тақырыптарды көтергендеріне ризашылығын білдірді.

Бұл пікір алмасудан түрлі инсайт алған жастар тағлымы мен тәлімі мол кездесуден мотивация алып шықты.