Психологтар ұзақ жасаушылардың басты мінез құлқын атады

Сардинияның "көгілдір аймағында" – жүз жасағандардың үлесі өте жоғары өңірде тұратын адамдардың физикалық денсаулығы мен өмір салты көршілерінен ерекшеленбейді, бірақ олар бір тұлғалық қасиеті жағынан айтарлықтай басым: бұл – жаңа тәжірибеге ашықтық. Соңғы зерттеулерге сүйенсек, дәл осы қасиет олардың қартайғанша белсенді болуына көмектесетін көрінеді. Италиялық зерттеушілер осындай тұжырымға келді, деп хабарлайды Tengri Life тілшісі Газета.Ru басылымына сілтеме жасап.

Кальяри университетінің психологы Мария Кьяра Фастаме мен оның әріптестері аралдың 71 мен 101 жас аралығындағы 125 тұрғынын зерттеді: олардың 55-і "көгілдір аймақта", ал 70-і әлеуметтік-экономикалық жағдайы ұқсас және тегін медицинаға қолжетімділігі бірдей көршілес қауымдастықтарда тұрады.

Қатысушылар психологиялық саулық, денсаулыққа байланысты өмір сапасы және Big Five моделі бойынша тұлғаның бес негізгі қасиеті (ашықтық, адалдық, экстраверсия, мейірімділік және нейротизм) бойынша тест тапсырды. Сондай-ақ стресске төзімділік дағдылары мен хоббиге бөлетін уақыттары бағаланды.

"Көгілдір аймақ" тұрғындары денсаулыққа байланысты өмір сапасы бойынша айтарлықтай жоғары нәтиже көрсеткен жоқ. Есесіне, оларда ашықтық деңгейі - әлемге деген қызығушылық, интеллектуалды ізденіске және жаңа әсерлерге дайындық деңгейі айтарлықтай жоғары болып шықты, сонымен қатар стресспен күресу дағдылары жақсырақ дамыған және белсенді демалысқа көбірек уақыт бөлетіні анықталды.

Авторлардың пікірінше, ашықтық ұзақ өмір сүруге жанама түрде әсер етеді: бұл қасиеті жоғары адам жаңа таныстықтарға құмар келеді, жаңа қызығушылықтарды тез меңгереді, оқуын жалғастырады және физикалық тұрғыдан белсенді болады. Осылайша қартаюды бәсеңдететін әдеттерді нығайта түседі.

Тағы бір маңызды қасиет - адалдық (жауапкершілік) - өмірге деген қанағаттанушылықпен және стресске төзімділікпен байланысты болды. Ал нейротизм (жағымсыз эмоцияларға бейімділік), керісінше, тұрғылықты жеріне қарамастан, өмір сапасының төмендеуіне әсер еткен.

Зерттеу International Journal of Applied Positive Psychology (IJAPP) журналында жарияланған.

Google News арқылы жаңалықтарымызды қадағалаңыз