Қайрат футбол клубы академиясының басшысы аяқ астынан көз жұмды

АСТАНА, 1 желтоқсан – Sputnik. "Қайрат" ФК академиясының басшысы Кирилл Кекер 46 жасында күтпеген жағдайда өмірден өтті, деп хабарлады футбол клубының баспасөз қызметі.

"Бұл — бүкіл клуб үшін орны толмас ауыр қайғы. Он жылдан астам уақыт "Қайрат" жүйесінің ажырамас бөлігі болып, қазақ футболының даму бағытын айқындауға атсалысқан адамның қазасы бәрімізді терең күйзелтті", деп жазылған хабарламада.

Кирилл Сергеевич өз ісіне адал, талапшыл әрі әділ маман болды. Жас ойыншылардың мүмкіндігін ашып, ең маңызды сәттерде қолдау көрсетуді білетін нағыз тәлімгер еді.

"Оның Академияның, негізгі команданың, Қазақстан жасөспірімдер құрамасының дамуына қосқан үлесі зор", - дейді клуб мамандары.

Әр жылдары клуб құрылымында маңызды лауазым атқарды. 2022–2024 жылдары сары-қаралардың негізгі командасын басқарды. 2025 жылы Академияға жетекшілік етіп, сонымен бірге Қазақстан U-19 құрамасымен жұмыс істеп, жаңа буын футболшыларын қалыптастыруды жалғастырды.