Қарағанды облысында алғашқы өңірлік пилоттық жоба Аналитика мектебі өз жұмысын бастайды

Сенат жанындағы сарапшылар клубтары мен Аналитика мектебінің 5 жылдығына орай «Талдау форумы» өтті, - деп хабарлайды Aikyn.kz.

5 жыл ішінде Аналитика мектебі 300-ден астам түлекті даярлап шығарды. Олар бүгінде еліміздің түрлі салаларында сараптамалық мәдениетті нығайтуға және талдау сапасын арттыруға айтарлықтай үлес қосып келеді.

Форумда Парламент Мәжілісінің Спикері Маулен Сағатханұлы Әшімбаев бұл бастаманы қолдайтынын атап өтті. Енді Қарағанды облысында Аналитика мектебінің алғашқы өңірлік пилоттық жобасы іске қосылады.

Қарағанды облысы жоғары білім мен интеллектуалды әлеуеті зор өңір саналады. Мұнда 8 жоғары оқу орны жұмыс істейді, онда мыңдаған талантты студент, соның ішінде 2000-нан астам магистрант пен докторант білім алуда.

Жоба аясында профессорлық-оқытушылық құрам, магистранттар мен докторанттарды аналитикалық қызметке белсенді тарту, зерттеу дағдыларын дамыту көзделіп отыр.

- Қатысушыларды жетекші сарапшылар мен тәжірибелі мамандар өткізетін дәрістер мен мастер-кластар, мазмұнды оқу бағдарламасы және Қазақстанның кең ауқымды аналитикалық қауымдастығының бір бөлігі болу мүмкіндігі күтеді. Жобаға қатысу шарттары мен қатысушыларды іріктеу туралы толық ақпарат жақын арада жарияланатын болады. Біздің өңір үшін бұл – зор құрмет әрі үлкен жауапкершілік, - деді Қарағанды облысының жастар саясаты мәселелері жөніндегі басқармасының басшысы Айсұлу Ерниязова.