Қарағандыда дәрі тапшылығы жоқ

Қарағанды өңірінде ЖРВИ мен тұмауға қарсы қолданылатын препараттар қоры жеткілікті, дәріханаларда тапшылық жоқ. Бұл туралы Медициналық және фармацевтикалық бақылау комитетінің облыстық департаменті мәлімдеді, деп хабарлайды Egemen.kz.

Фото: Ашық дереккөз

Қарағанды облысының Медициналық және фармацевтикалық бақылау департаменті аймақта дәрі-дәрмекпен қамтамасыз ету жағдайы тұрақты екенін мәлімдеді. ЖРВИ мен тұмауды емдеуге арналған негізгі препарат топтарына жүргізілген мониторинг нәтижесі дәріханаларда тапшылықтың байқалмайтынын көрсеткен. Мамандардың айтуынша, тұрғындар тарапынан сұраныстың күрт өсуі де тіркелмеген.

Департамент деректеріне сүйенсек, Қарағанды, Теміртау, Балқаш қалаларындағы дәріхана желілерінде вирусқа қарсы препараттар, ересектер мен балаларға арналған қызу түсіретін дәрілер, сондай-ақ симптоматикалық емге қолданылатын құралдардың толық спектрі бар.

«Вирусқа қарсы негізгі препараттар, парацетамол және ибупрофен негізіндегі дәрілер барлық дәріханаларда жеткілікті. Қоймалардағы жағдай тұрақты, тапшылық жоқ», деп мәлімдеді ведомство мамандары.

Ірі дистрибьюторлармен дәрі жеткізу мәселелері алдын ала келісілді, ал дәріхана желілерін толықтыру жоспарлы түрде жалғасып жатыр. Департамент жеке препараттардың қысқа уақытқа қолжетімсіз болуы логистикалық себептерге, жөнелту немесе қабылдау мерзімдеріне байланысты екенін түсіндірді.

Сонымен қатар, тұрғындарға дәріханаларда сұранысқа ие препараттардың қолжетімді баламалары бар екені ескертіледі. Дәрі таңдағанда белсенді затқа назар аударған жөн, қажет болса фармацевт кеңесіне жүгінуге болады.

Министрліктің дәрілік қолжетімділікті арттыру саясатының нәтижесінде кейбір препараттардың бағасы төмендеп келеді. Мысалы, Сумамед пен Ципролет сияқты бактерияға қарсы дәрілер бұрынғыға қарағанда қолжетімдірек. Ал рецептсіз сатылатын препараттар – парацетамол, ибупрофен және басқалардың бағасы әр дәріханада әртүрлі болуы мүмкін. Бұл баға нарығының еркін қалыптасуы мен дәріхана ұйымдарының жеке баға саясатына байланысты.