Қарағандыда екі миллиард теңгеге жуық қаржы жымқырған көпбалалы әйелге қатысты сот басталды

Тергеу материалдарына сәйкес, айыпталушы әйел Қытай, Түркия және Ресейден тауар жеткізумен айналысқан интернет-дүкен жүргізген. Онда тұрмыстық заттардан бастап, жиһаз, тұрмыстық техника, тіпті автокөлік пен квадроциклге дейінгі түрлі тауар ұсынылған. Сатып алушыларды арзан баға, тиімді жеңілдіктер және әлеуметтік желілердегі жарнамалар қызықтырған. Тіпті дүкенді танымал блогерлер де насихаттап, сенім тудырған.

Бастапқы кезеңде тапсырыстар уақытылы жеткізіліп отырған. Бұл клиенттердің сенімін одан әрі арттырған. Алайда уақыт өте келе ірі көлемдегі тапсырыстар орындалмаған. Ақысын алдын ала төлеген сатып алушылар апталап күткен тауарларын ала алмаған. Кейбірі сатушыға шағымданғанда, ол керісінше қорқытып, «полицияға жүгінсеңдер, ақшаларыңнан да, тапсырыстарыңнан да айырыласыңдар» деп жауап берген.

Алаяқтықтың құрбаны болған 447 адам еліміздің әр өңірінен жиналған. Олар ақшалары мен тапсырыстарынан айырылғанын айтады. Тергеу барысында анықталғандай, айыпталушы сол уақытта қымбат көлік мініп, сәнді өмір сүрген. Жәбірленушілер өз беттерінше дәлелдер жинап, істің қозғалуына себепкер болған.

Күдікті әйел ұсталғаннан кейін жүкті екенін растайтын медициналық анықтама ұсынған. Осы себепті ол қамаудан босатылып, үйқамаққа ауыстырылған. Дегенмен жәбірленушілер сот тыңдалымында істі қайта тергеуге жіберуді талап етті. Олардың пайымынша, айыпталушы жалғыз әрекет етпей, ұйымдасқан топтың құрамында болуы мүмкін.

Айыпталушы өз кінәсін мойындамай отыр. Ол көптеген жәбірленушіні танымайтынын және олардың қаражаты өз есепшотына түспегенін алға тартуда. Сондай-ақ ол сот процесінде өз бейнесін түсіруге тыйым салған.

Бұл іс қоғамда кең резонанс тудырды. Әлеуметтік желілерде жәбірленушілер бірігіп, өздерінің бастан кешкен жағдайларын бөлісіп жатыр. Олар интернет-сауда саласында бақылауды күшейтуді, ал онлайн дүкендердің жұмысын қатаң реттеуді сұрап отыр.

Осыған дейін мамандар интернет алаяқтары айласын асыру үшін түрлі әдістерді пайдаланатынын айтты. Оның ішінде ең қауіптісі адам психологиясына әсер ету арқылы жасалатын алаяқтық әрекеттер екенін атап өткен болатын.