Қарағандыда есірткі таратқан шетелдіктер ұсталды

Қарағандыда «Қарасора – 2025» жедел алдын алу іс-шарасы кезінде есірткі саудасымен айналысқан шетелдіктер қолға түсті, деп хабарлайды Arasha.kz.

Республикалық деңгейде жүргізіліп жатқан операция аясында есірткі қылмысына қарсы іс-қимыл қызметкерлері арнайы шара ұйымдастырған. Нәтижесінде қала көшелерінің бірінен 29 және 39 жастағы екі шетел азаматы ұсталды.

Тінту барысында олардың бірінен құрамында A-PVP болуы мүмкін, әрқайсысы шамамен 0,5 грамм тартатын 11 түйіншек және қосымша 0,5 пен 1 грамдық тағы 11 орама табылып, тәркіленді. Ал екінші күдіктінің телефонынан куратормен хат алмасулар мен есірткі жасырылған орындардың суреттері анықталған. Көрсетілген мекенжайлар тексерілгенде ұқсас зат салынған 16 түйіншек табылды.

Күдіктілердің тұрғылықты жерінен де тінту жүргізіліп, салмағы 0,5 грамм болатын, алдын ала мефедрон деп болжанған бір түйіншек алынды.

Қазіргі уақытта екі азаматқа қатысты қылмыстық іс қозғалып, олар уақытша ұстау изоляторына қамалды. Барлық тәркіленген заттар сараптамаға жіберілді, оның нәтижесінде нақты құрам мен салмақ анықталатын болады.

Тергеу жалғасуда.