Қарашадағы қара өлең

Қараша туса Қарағандының аспанында өлеңнің үні, саздың сарыны қалықтайды. Себебі дәл осы уақытта көпшілік асыға күтетін дәстүрлі «Қарашада өмір тұр…» атты әдеби-сазды кеш өтеді.

Биылғы кеш өзгеше сипат алды. Кештің құрылымын белгілі театр актері әрі режиссері ­Дунай Еспаев жасап, қойылым­дық тұрғыда жаңа серпін әкелді.

– Арқада талантты жастар көп. Бірі – өлең жазса, бірі – әнді жүрекпен орындайды. «Қарашада өмір тұр…» кеші сол дарын иелерін табыстырып, жаңа ізденістерге жол ашады. Сахнада буын сабақтасты­ғы көрініс табады. Ертеңгі мәдениеттің жүгін арқалайтын жаңа толқын осы ортада өсіп келеді, – дейді Дунай Еспаев.

Кешті «Tattimbend» ан­сам­блі жанды музыкамен сү­йемелдеп отырды. Әуенмен өріл­ген өлең – көрерменін өзінің әдемі әлеміне баурап алды.

Поэзия кеші Абай атын­дағы Мемлекеттік сыйлық­тың лау­реаты, ақын Серік Ақсұңқар­ұлының «Өмір деген – күнді айналу» атты өлеңімен бас­талды. Жас ақын Ерік Нарын ерекше сезіммен оқыған бұл өлең кештің рухани бағытын айқындап, ойдың биігіне жетелегендей еді.

Одан әрі Бағдат Мүбәрак, Руслан Нұрбай, Серік Сағын­тай сынды ақындардың жырларын «Дат» театрының ак­тер­лері оқыды. Ал Ерғанат Кеңесбекұлы, Салтанат Сма­ғұлтегі, Сұлтан Дәулетхан өлеңдерімен кештің тақы­рыбын аша түскендей.

Кеште сондай-ақ, Қуа­ныш Медеубаев, Айбек Бай­төре, Жәлел Шалқар, Ер­болат Қуатбек сынды жас шайыр­лар­дың жырлары да оқылды. Әр жол, әр ырғақ – бір тағдыр, бір тыныс, бір мұң мен бір үміттің көрінісіндей. Күздің сары бояуындай нәзік те сырлы өлеңдер мен классикалық әндер көрермен жүрегін тербеді.

Айтпақшы, «Дат» театры­ның құрамындағы ең жас актер Тоқтар Кәрібай әдеби саз­ды кештегі көрермен көз­айымы болды. Өнерге деген құштарлығы ерте оянған мектеп оқушысы Ерболат Қуат­бектің өлеңін оқыды.

Кеш соңын Қазақстанның еңбек сіңірген әртісі, белгілі әнші-композитор Гүлнәр Дәу­кенова Мұқағали Мақатаевтың сөзіне жазылған «Күрең күз» әнімен түйіндеді.

Қарағанды облысы