Қарғалыда оқушының зорлыққа ұшырағаны туралы іс тергеліп жатыр

Алматы облысының Жамбыл ауданында бірнеше мектеп оқушысының жетінші сынып оқушысына азғындық жасау дерегі бойынша тергеу жүріп жатыр, деп хабарлайды Azattyq Rýhy.

Аудандық білім бөлімінің мәліметі бойынша, 13 қазан күні мектеп директорына 2025 жылдың 21 қыркүйегінде демалыс күні мектеп аумағынан тыс жеке үйде кәмелетке толмағандарға қатысты оқиға туралы мәлімет түсті. Мектеп директоры Қарғалы ауылында кәмелетке толмағандардың оқиғасынан кейін дереу құқық қорғау органдарына хабарлаған.

Полиция департаменті аталған дерек бойынша Қылмыстық кодекстің 124-бабының 1-бөлімі бойынша қылмыстық іс қозғалып, толықтай анықтау үшін қажетті процессуалдық іс-шаралар жүргізіліп жатыр деп хабарлады. 

Білім бөлімі хабарлағандай, ҚР Қылмыстық-процессуалдық кодексінің 201-бабына сәйкес, прокурор рұқсатынсыз тергеу материалдарын жариялауға тыйым салынады, ал ҚК 423-бабы мұндай әрекет үшін қылмыстық жауапкершілік қарастырады. Сонымен қатар, ҚК 274-бабы қоғамдық тәртіпті бұзуға немесе елеулі зиян келтіруге әкеп соқтыратын жалған ақпаратты таратуға қатысты жауапкершілік қарастырылған.

Облыстық психологиялық қолдау орталығының мамандары зардап шеккен қызға көмек көрсетіп жатыр. 

«Қоғамдық назарды балаларға қатысты тақырыптарда жалған ақпарат таратуға және хайп жасауға жол берілмесін», – деді Білім бөлімінің жетекшісі Светлана Алтынбекова.

Қазір оқиғаға қатысы бар оқушыларға жеке профилактикалық және түсіндіру жұмысы жүргізіліп жатыр. 

Бүгін, 09:57