Qarmet ыстық мырыштау және полимерлі жабын кешені құрылысын бастады

Осылайша Қазақстан металлургиясы жаңа технологиялық деңгейге қадам басты. Қарағандыдағы кешен болат өндірісін арттырып, импортқа тәуелділікті азайтуға мүмкіндік береді. Бұл – Мемлекет басшысы Қасым-Жомарт Тоқаевтың тапсырмасына сәйкес жүзеге асырылып жатқан компанияның болат өндіру дивизионын жаңғыртудың ауқымды бағдарламасындағы басты бағыттардың бірі. 

Халықаралық тендердің қорытындысы бойынша Qarmet серіктесі ретінде Бельгияның инженерлік компаниясы John Cockerill таңдалды. Әлемдік деңгейдегі аталған компания ыстық және суық илек, үздіксіз мырыштау және полимерлі жабын жағу технологиялары саласында көшбасшы саналады. Оның жабдықтары Еуропа, Азия және Таяу Шығыстың ірі металлургиялық кәсіпорындарында қолданылады және өнім сапасын арттырып, өндіріс тиімділігін қамтамасыз етеді. 

Бүгінде Qarmet құрылымында жылына 592 мың тонна өнім шығаратын екі ыстық мырыштау желісі және 115 мың тонна өнім өндіретін полимерлі жабын желісі жұмыс істейді. Ал жаңа кешен іске қосылған соң, кәсіпорын жыл сайын 844 мың тонна мырышталған болат пен 254 мың тонна полимерлі жабынды болат шығара алады. Сондай-ақ өнімнің қалыңдығы мен ендік өлшемдері кеңейіп, нарықтың жаңа сегменттерін қамтуға жол ашылады. 

Жаңа өндірістік торап Qarmet кәсіпорнындағы технологиялық жаңғырудың өзегіне айналмақ. Ол құрылыс, машина жасау және инфрақұрылым салаларына арналған отандық, бәсекеге қабілетті әрі импортты алмастыратын өнім шығаруға мүмкіндік береді. Осылайша, Қазақстан ішкі нарықты заманауи мырышталған және полимерлі жабынды болатпен толық қамтамасыз етіп, экспорттық әлеуетін арттыра алады. 

Жобаның жалпы инвестициялық көлемі – шамамен 84 миллиард теңге. Кешеннің іске қосылуы 2027 жылға жоспарланған. Оның жүзеге асырылуы нәтижесінде шамамен 350 жаңа жұмыс орны ашылып, өндіріс көлемі мен өнім сапасы едәуір артады. 

Компания өкілдерінің айтуынша, бұл – тек жаңа жабдық орнату жобасы емес, отандық металлургияның болашағына бағытталған стратегиялық инвестиция. 

– Qarmet тұрақты даму мен жаңғырту стратегиясын кезең-кезеңімен жүзеге асырып келеді. Біздің мақсатымыз – өндіріс қуатын арттырып қана қоймай, қазақстандық болат сапасын жаңа деңгейге шығару, - деп атап өтті кәсіпорынның баспасөз қызметінен.

Осылайша елдің болат индустриясын сапалық жаңа деңгейге көтеріп, қазақстандық өнімді жаһандық нарықта бәсекеге қабілетті етуге бағытталған маңызды қадам жасалып отыр. Ыстық мырыштау және полимерлі жабын кешенінің құрылысы Қарағандының Қазақстан металлургиясының басты орталығы екенін тағы бір мәрте дәлелдей түсті. 

Айта кетсек, бұған дейін Qarmet металлургия комбинатын газдандырудың ауқымды бағдарламасы жүйелі түрде жүзеге асырылып келе жатқаны хабарланған болатын.