​Қашағанның триллиондық айыппұлы: NCOC тың 20 шілдеге дейін уақыты бар

Қашаған кен орнының операторы «North Caspian Operating Company» (NCOC) 20 шілдеге дейін 2,3 триллион теңге (шамамен 4,8 миллиард доллар) көлеміндегі экологиялық айыппұлды төлеуі тиіс. 

Бұл туралы Әділет вице-министрі Даниел Ваисов мәлімдеді.

«Егер 20 шілдеге дейін айыппұл төленбесе, Қазақстан заңнамаға, соның ішінде атқарушылық өндіріс туралы заңға сәйкес бұдан былайғы әрекеттерін жүзеге асырады», — деді Ваисов.

Оның айтуынша, мердігерлер Қазақстанның мемлекеттік органдарының әрекетімен келіспей, Вашингтондағы Инвестициялық дауларды реттеу жөніндегі халықаралық орталыққа (ICSID) талап-арыз түсірген. Шілде айының соңына дейін төрешілер (арбитрлар) анықталуы тиіс.

NCOC-қа қатысты экологиялық талаптар төңірегіндегі сот даулары 2023 жылдың наурыз айынан бері жалғасып келеді. Бұған дейін Атырау облысы бойынша Экология департаменті компанияға белгіленген лимиттен тыс 1 миллион тоннадан астам күкіртті артық сақтағаны үшін айыппұл салған болатын.

Бұл айыппұлдың көлемі 2 триллион 356 миллиард 293 миллион 268 мың теңгені құрады.

Бұдан бөлек, компанияға апаттық жағдайда күкіртті газды рұқсатсыз шығарғаны және жаққаны үшін тағы 1 миллиард 506 миллион 914 мың теңге көлемінде талап қойылды.

Осылайша, экологиялық айыппұлдардың жалпы сомасы 2,3 триллион теңгеден асады.

NCOC қазақстандық мемлекеттік органдардың шешімдерімен келіспейді және оларға дауласуды жалғастыруда. Ал қазақстандық тарап «ластаушы төлейді» принципін ұстана отырып, істі соңына дейін жеткізуге ниетті екенін мәлімдеп отыр.

Жобаның шетелдік акционерлері қатарында әрқайсысы 16,81%-дан үлеске ие «ExxonMobil», «Shell», «Eni» және «TotalEnergies» компаниялары бар. Сондай-ақ «CNPC» — 8,3% және «INPEX» — 7,56% үлеске иелік етеді.

Қашаған — Қазақстандағы ең ірі мұнай-газ жобаларының бірі. Экологиялық айыппұл төңірегіндегі бұл дау мемлекет пен халықаралық мұнай-газ консорциумы арасындағы ең ірі сот процестерінің біріне айналды.

Бүгін, 16:06