Қауіпсіздік Кеңесі хатшыларының үшінші кездесуі: ынтымақтастық пен киберқауіпсіздік

Кездесу қарсаңында делегация басшыларын Қырғыз Республикасының Президенті Садыр Жапаров қабылдады.

Жиын барысында жаңа сын-тегеуріндер мен өңірлік қауіпсіздікке төнетін қатерлерге қарсы іс-қимыл мәселелерінің кешені қаралды.

— Өз сөзінде Ғизат Нұрдәулетов халықаралық терроризм мен экстремизмге қарсы іс-қимыл саласындағы ынтымақтастықты нығайтудың маңызды екенін атап өтті. Сонымен қатар Орталық Азия мен Үндістан арасындағы көлік байланысын дамытуға ерекше назар аударылып, экономикалық өзара байланысты қамтамасыз ету тетіктері мен киберқауіпсіздік саласындағы әріптестікті дамыту жолдары ұсынылды, — делінген хабарламада.

Басқосу аясында үнді тарапының бастамасымен Қазақстан Қауіпсіздік Кеңесінің хатшысы мен Үндістанның ұлттық қауіпсіздік жөніндегі кеңесшісі Аджит Довалдың екіжақты кездесуі өтті.

Қыркүйек айында Мемлекет басшысы Қауіпсіздік Кеңесінің киберқауіпсіздік жөніндегі отырысын өткізген болатын.