Қазақ қытай арасындағы визасыз қатынас жемісін берді

Қазақстан мен Қытай арасында визасыз қатынас орнағалы барыс-келіс артты, деп хабарлайды 24KZ. Шекара қызметінің мәліметіне қарағанда кейінгі екі жылда қос ел арасында 3 миллионнан астам адам қатынады. Инвестиция көлемі күрт өсіп, сауда-саттық бұрын-соңды болмаған рекордқа жетті. Қарым-қатынас пен іскерлік байланыс жаңа деңгейге көтерілді.

Осы айда өзара визалық талаптардан босату туралы қазақ-қытай үкіметаралық келісіміне 2 жыл болды. 2023 жылы қабылданған шешім қазір нақты жемісін беріп жатыр. Талай кедергі жойылып барыс-келіс артты. Статистикаға сәйкес былтыр Қазақстанның 661 мың азаматы Қытайға келіп кетсе, бұл жақтан 675 мың адам біздің елге барып қайтқан. Дені орта және шағын кәсіп иелері.

Шахрат Нұрышев, ҚР Қытайдағы Төтенше және Өкілетті Елшісі:

- Биылғы мәлімет бойынша, шекара қызметінің мәліметі бойынша 1 қаңтардан бастап Қазақстанның 840 мыңнан астам азаматы Қытайға келіп кетті. Дәл сол мезгілде Қытайдың 870 мың азаматы Қазақстанға барып қайтты. Тағы да қарасаңыз, айырмашылық үлкен емес. 70 есе артық халық санын есептегенде бұл айырмашылық өте кішкентай.

Бүгінде әуе қатынасы айтарлықтай кеңейді. Қазір Қазақстан мен Қытай арасында 15 бағыт бойынша аптасына тұрақты түрде 86 рейс қатынайды. Оның ішінде Астана, Алматы, Шымкенттен Қытайдың 7 қаласына тікелей рейстер бар. Әсіресе Үрімжідегі «Тянь-Шань» халықаралық әуежайы арқылы қатынас белсенді. Соңғы екі жылда мұнда 179 мың жолаушы тіркелген. Олардың 118 мыңы Қазақстан азаматтары.

Ван Вэй, Үрімжі шекаралық бақылау бекетінің қызметкері:

- Виза талаптарынан өзара босату туралы келісімінен кейін халықаралық әуе қатынасы артты. Қазақстан қалалары мен Үрімжі арасында рейстер жиіледі. Қазір екі ортада аптасына 50 рейс тұрақты түрде қатынайды. Бұл өткен жылмен салыстырғанда 43% көп. Ал жолаушылар саны 25% артып отыр.

Экономикалық байланыс күшейді. Әсіресе орта және шағын кәсіпкерліктің тынысы ашылды. Сауда-саттық өсіп рекордтық көрсеткішке жетті. Тек алғашқы жылдың өзінде көрші елмен 43 миллиардтан астам долларға сауда жасалса, биыл 10 айда 40 млрд долларға жуықтады. Әлі алда 2 айдың қорытындысы бар.

Шахрат Нұрышев, ҚР Қытайдағы Төтенше және Өкілетті Елшісі:

- Орталық Азиядағы визасыз режимді енгізу бойынша бірінші келісім болды. Бізден кейін көршілес мемлекеттер де дәл осындай келісімдерге қол қоюды қолға алды. Қазақстан мен Қытайдың арасындағы қарым-қатынастардың биік деңгейін ескере отырып, осы келісімді одан әрі іске асырып, біздің Қазақстан халқының мүддесіне, пайдасына асырамыз деп ойлаймын.

Қазақстан мен Қытай достық, тату көрші және стратегиялық серіктестікті нығайтуға ерекше мән беріп келеді. Осының арқасында биыл жарты жылдың өзінде көрші мемлекеттен тартылған инвестиция көлемі 1,1 млрд АҚШ долларға жетті. Ал теміржол арқылы тасымалдан жүктің көлемі биыл 35 млн тоннаға жетеді деген болжам бар.

Авторлары: Руслан Бақытбекұлы, Мадияр Ерсайын