Қазақстан алдағы үш жылда тұрақты экономикалық өсімге қол жеткізеді

Үкімет еліміздің 2026-2028 жылдарға арналған әлеуметтік-экономикалық даму болжамын ұсынды. 

Мәселен, келер жылы жалпы ішкі өнімнің өсімі 5,4%, ал үш жылдағы орташа жылдық көрсеткіш 5,3% деңгейінде болады. Демек Үкімет Президент тапсырғандай «саннан сапаға» бет бұрады. Экономикалық өсімнің негізгі қозғаушы күші – нақты сектор мен қызмет көрсету саласы. Өңдеу өнеркәсібінде өсім қарқыны 2026 жылы 6,2%-дан 2028 жылы 6,6%-ға дейін артады. Бұл көрсеткіш ауқымды инвестициялық жобаларды жүзеге асырудың нәтижесінде қамтамасыз етіледі. Ал Ұлттық қор – елдің басты қаржылық қалқаны. Сондықтан қазынадағы қаржыдан шашау шығармай жинақтау мен тұрақтандыруды күшейтуге басымдық берілмек.

Жәнібек Айғазин, AERC Қолданбалы экономиканы зерттеу орталығының бас директоры:

- Жалпы ішкі өнімнің өсу қарқыны өте жоғары. Әрине, бұл жақсы көрсеткіш. Өздеріңіз білетіндей, біз 2024 жылы ұлттық даму жоспарын бекіттік. 2029 жылға қарай Жалпы ішкі өнім көлемін екі есе арттыру бойынша стратегиялық міндет тұр. Ал экономикалық өсім ел халқының әл-ауқат деңгейі, тұрмыс сапасы және төлем қабілетіне тікелей әсер етеді. Қазір экономиканы әртараптандыру үшін нақты жұмыстар жүргізіліп жатыр. Бұл тек сөз жүзінде емес, көп салада байқалады.