Қазақстан мен Өзбекстан серіктестігі арта түседі

Бүгінде Қазақстан мен Өзбекстан арасында жалпы сомасы бір жарым миллиард доллардан асатын 78 бірлескен жоба бар. Бұл туралы Қос ел президенттерінің қатысуымен өткен Жоғары мемлекетаралық кеңестің екінші отырысында айтылды. 

Жиында екі елдің сауда-экономика, көлік-транзит, су-энергетика және мәдени-гуманитарлық салалардағы ынтымақтастық мәселелері қаралды. Мемлекет басшысы бауырлас ел арасында сан қырлы ықпалдастықтың даму қарқынын арттыру қажет екенін атап өтті. Мемлекет басшысының айтуынша, ауыл шаруашылығы саласындағы ынтымақтастықтың әлеуеті зор. Қасым-Жомарт Тоқаев қарапайым саудадан гөрі ет, бидай, майлы дақылдарды өңдеудің толық өндірістік тізбесін қалыптастыруды, мал шаруашылығы мен органикалық егін шаруашылығын бірге дамытуды ұсынды. Бұған қоса Президент өнеркәсіп кооперациясына үлкен үміт артады.

Қасым-Жомарт Тоқаев, Қазақстан Республикасының Президенті:

- Мен осы мемлекеттік сапарыма айырықша мән беріп отырмын. Бұл сапардың басты мақсаты қос халықтың достығын нығайтып, тату көршілік байланысты күшейту. Сондай-ақ түрлі саладағы өзара ынтымақтастықты дамыта түсу. Құрметті Шавкат Миромонович, өзіңіздің қажырлы еңбегіңіздің арқасында еліңізде көптеген оң өзгеріс болып жатыр. Халықтың әл-ауқатын жақсартуды көздейтін маңызды бастамалар қолға алынды. Өзбекстан – біз үшін туыстас, ағайын ел, тату көрші әрі сенімді серіктес. Қос ел арасындағы достықтың тамыры терең, халықтарымыздың рухани құндылықтары ортақ деуге болады. Қазақ-өзбек қарым-қатынасы стратегиялық серіктестік және одақтастық рухында қарқынды дамып келе жатыр. Сізге ерекше ризашылығымды білдіргім келеді.

Сондай-ақ президент сирек кездесетін металдарды өндіру және өңдеу саласындағы серіктестік перспективті бағыттың бірі саналатынын  жеткізді. Бұдан бөлек, Мемлекет басшысы Транскаспий халықаралық көлік бағдарын, Солтүстік – Оңтүстік дәлізін, сондай-ақ Ауғанстан арқылы теміржол бағытын дамыту аясындағы тиімді ықпалдастықты жалғастыру өзекті екенін айтты. Қасым-Жомарт Тоқаев өзбек тарапын Транскаспий халықаралық көлік бағытын бірге өркендету үшін Ақтау және Құрық порттары бойынша серіктестік құрып, логистикалық жобаларды жүзеге асыруға шақырды.