Қазақстан мен Ресей шекарадағы жүк тасымалдаушыларға қатысты шектеу мәселесін реттеді

АСТАНА, 10 қазан – Sputnik. Мәжіліс депутаты Болатбек Әлиев әлеуметтік желіде Қазақстан мен Ресей арасындағы келіссөздердің қорытындысы бойынша халықаралық жүк және жолаушылар тасымалымен айналысатын жүргізушілерге жаңа миграциялық шектеулерді қолданбау туралы шешім қабылданғанын хабарлады.

"Біздің үкімет Ресей Федерациясындағы әріптестерімен жедел арналар арқылы хабарласып, кеше кешкісін халықаралық жүк және жолаушылар тасымалымен айналысатын жүргізушілерге жаңа миграциялық шектеулерді қолданбау туралы шешім қабылданды", - деп жазды депутат.

Бұл мынаны білдіреді:

қазақстандық тасымалдаушыларға "Ресей аумағында 90 күн болу" талабы қолданылмайды;

депортация және айыппұл шаралары тоқтатылды;

көлік саласындағы жұмыс орындары сақталды.

Еске салайық, 1 қаңтардан бастап Ресейде күшіне енген заңға сәйкес шетелдіктер Ресей Федерациясында тіркеусіз жылына 90 күннен аспайтын мерзімде бола алады(бұрын 180 күн болған). Ресей мен Беларусь аумағында болу бірге саналады.

Қыркүйек айынан бастап Ресейдің заңсыз импортты анықтау бойынша жүргізіліп жатқан рейді шекарадағы жағдайды қиындатқан. Қосымша тексерулердің салдарынан жекелеген өткізу пункттерінде жүк көлігін тексеру уақыты артты.

Қазақстан үкіметі бұл жағдайды сыртқы саудаға кедергі келтіретін тосқауыл деп тану туралы Еуразиялық экономикалық комиссияға ресми өтініш жолдады. Мәселе 13 қазанда ЕЭК алаңында және 7 қарашада Қазақстан мен Ресей ынтымақтастығы жөніндегі үкіметаралық комиссияның отырысында қаралады деп жоспарланған болатын.