Қазақстан мұнайы Германияға “Достық” арқылы бармай жатыр: Энергетика министрлігі жағдайды түсіндірді

Қазақстанның энергетика вице-министрі Ерлан Ақкенженовтен биылғы мамырда тасымалы тоқтатылған "Достық" құбырына қатысты жағдай туралы сұралды. Оның айтуынша, бұл мәселені шешуде әзірге ілгерілеушілік жоқ, - деп хабарлайды Tengrinews.kz.

Қазақстанның энергетика вице-министрі Ерлан Ақкенженовтен биылғы мамырда тасымалы тоқтатылған "Достық" құбырына қатысты жағдай туралы сұралды. Оның айтуынша, бұл мәселені шешуде әзірге ілгерілеушілік жоқ, - деп хабарлайды Tengrinews.kz.

"Достық" құбыры бойынша қандай да бір ілгерілеушілік бар ма? СІМ Германияның экономика министрі келеді деп анонс жасаған еді. Герман тарапымен осы мәселелерді талқылау жоспарда бар ма? Жалпы бұл мәселенің болашағы қандай?", - деп сұрақ қойылды министрге үкімет кулуарында.

Ақкенженов герман тарапы Қазақстанға сапары барысында бұл мәселені міндетті түрде көтеретінін айтты.

"Жеке өз ойымша, неміс министрі бұл мәселені көтеретіні анық. Қазақстан "Шведт" зауытына мұнай жеткізетін негізгі елдердің бірі болғандықтан, немістер бұл мәселені, әрине, қозғайды. Бірақ бүгінде ресейлік тарап бізге техникалық мүмкіндікті растаған жоқ. Яғни, біздің алты айлық жоспарымызда әзірге нөлдік көрсеткіш тұр", - деді Ерлан Ақкенженов.

Ол шілдеде де "Достық" арқылы жеткізілімдер күтілмейтінін растады.

Бұған дейін БАҚ-та Ресей тарапының шешімімен 1 мамырдан бастап "Достық" құбыры арқылы Германияға қазақстандық мұнайды жеткізудің тоқтатылуы мүмкін екені туралы ақпарат тараған болатын. Сөз Қазақстанның Германиядағы мұнай өңдеу зауыттарына тәулігіне 200 мың баррельге дейін мұнай экспорттайтын бағыты туралы болып отыр.

Анықтама: "Достық" мұнай құбыры - КСРО-дан (қазіргі РФ және Қазақстан) Шығыс және Орталық Еуропа елдеріне мұнай тасымалдау үшін 1960 жылдары салынған әлемдегі ең ірі магистральдық мұнай құбыры жүйелерінің бірі. Жүйенің жалпы ұзындығы шамамен 8900 шақырым болады, ол Беларусь, Украина, Польша, Германия, Чехия, Словакия және Венгрия арқылы өтеді.

22 сәуірде Қазақстанның энергетика министрі Ерлан Ақкенженов журналистерге мұнай құбыры арқылы қазақстандық мұнай жеткізудің Ресей тарапының бастамасымен тоқтатылуы мүмкін екенін бейресми дереккөздерден білгенін хабарлады.

Оның айтуынша, Ресей тарапы мұнай айдауға техникалық мүмкіндіктің жоқтығын алға тартып отыр. Болжам бойынша, бұл инфрақұрылымға жасалған соққыларға байланысты болуы мүмкін.

Энергетика министрі жөнелтілмеген мұнай көлемі басқа маршруттар бойынша қайта бөлінетінін айтты. Биыл "Достық" үлесіне 80 миллион тонна қазақстандық мұнайдың шамамен 3 миллион тоннасы тиесілі, 2025 жылы 2,1 миллион тонна жеткізілген болатын. Қазақстан мұнайы "Шведт" зауыты тұтынуының шамамен 20-30 пайызын өтейді.

Google News арқылы жаңалықтарымызды қадағалаңыз