​Қазақстан шахматшылары Албанияда әлем чемпионатында жеңімпаз атанды

Қазақстанның жасөспірімдер құрамасы 4‑15 қазан аралығында Дуррес қаласында өткен жастар арасындағы әлем чемпионатында (FIDE World Youth Chess Championships 2025) керемет жетістікке қол жеткізді. Марк Смирнов пен Эдгар Мамедов әлем чемпиондары атанса, Сауат Нургалиев күміс медальді қанжығасына байлады. Бұл туралы Қазақстан шахмат федерациясының баспасөз қызметі хабарлайды. 

13 жасар Марк Смирнов 11 ұпайдан 9½ жинап, 14 жасқа дейінгі бозбалалар (O14) арасында әлем чемпионы атанды. Алматылық спортшы Қытай шахматшысы Цзян Хаочэнді (8½ ұпай) басып озып, соңғы турда Польшаға өкілдік еткен Петр Бжезинді 34 жүріспен анық жеңді. Бұл Марктың екінші алтын жүлдесі: 2022 жылы ол 10 жасқа дейінгілер санатында күміс медаль алды, ал 2023 жылы 12 жастағы спортшылар арасындағы чемпионатта жеңімпаз атанды. Албанияда ол сондай-ақ екінші халықаралық шебер нормасын орындады.

15 жастағы Эдгар Мамедов 8 ұпай жинап, 16 жасқа дейінгі бозбалалар (O16) арасында әлем чемпионы атанды. Дәл сондай нәтижеге қол жеткізген Сауат Нұрғалиев Бухгольц коэффициенті бойынша екінші орынға ие болды. Шешуші турда Сауат Үндістан шахматшысы Ваза Этанмен партияда 123 жүріс жасап, ойынды тең нәтижемен аяқтады. 8 ұпайдан алып, алты қарсыласынан басым түскен Эдгар мен Сауат тамаша ойын көрсетті.

Жарысқа 84 елдің 711 шахматшысы қатысты. Қазақстан намысын 14, 16 және 18 жасқа дейінгілер санатына кіретін 44 спортшы қорғады. Қыздар арасында Мария Холявко мен Зарина Нұрғалиева үздік нәтижелерімен көзге түсіп, өз жас санаттарында үздік ондыққа кірді.

Қазақстан шахмат федерациясының президенті Тимур Турлов жас спортшылардың бүгінгі жетістігі ұзақ жылғы жүйелі жұмыстың нәтижесі деп атап өтті:

«Қазір қалыптасып келе жатқан Қазақстан шахматшыларының жаңа буыны күні ертең әлемдік деңгейде шахматтың болашағын айқындайтын болады. Бұл жеңістердің артында жаттықтырушылардың, ата-аналардың және бүкіл командамыздың орасан зор еңбегі жатыр». 

Бүгін Қазақстан жасөспірімдер шахмат аренасында көшбасшы атанды. Бұл жетістік – елімізде шахматты дамыту жолында жүйелі жұмыс жүргізілуінің нәтижесі, соның ішінде Мемлекет басшысының тапсырмасымен Үкімет бекіткен Шахматты дамытудың кешенді жоспарын ерекше атап өту керек. Евгений Владимиров жетекшілік ететін жаттықтырушылар штабы жас спортшыларға кәсіби дайындықты қамтамасыз етеді. Қазақстан шахмат федерациясы іске асырып жатқан жас дарын иелерін қолдау бағдарламасы бұл бағытта басты рөл атқарады: 45 грант үшінші жыл қатарынан үздік жас шахматшыларға оқу-жаттығу жиындарына, халықаралық турнирлерге қол жеткізуге және жетекші жаттықтырушылардан сабақ алуға мүмкіндік беріп отыр. Осындай қолдау жасау жас ойыншылардың әлеуетін ашып, әлемдік аренада жоғары нәтижеге қол жеткізуіне көмектеседі.

Бүгін, 17:37