Қазақстан және ОПЕК+ ұйымына мүше басқа жеті ел сәуірден( бастап мұнай өндірісін арттырады

Бұған дейін 2023 жылдың сәуір және қараша айларында қосымша түзетулер енгізілгенін жариялаған сегіз ОПЕК+ елі — атап айтқанда, Қазақстан, Сауд Арабиясы, Ресей, Ирак, БАӘ, Кувейт, Алжир және Оман — 2026 жылдың 1 наурызында әлемдік нарық жағдайлары мен перспективаларын қарау үшін виртуалды кездесу өткізді.

Қатысушы елдер 2023 жылдың сәуірінде жарияланған тәулігіне 1,65 миллион баррель көлеміндегі қосымша ерікті түзетулерді кезең-кезеңімен алып тастау туралы шешім қабылдады және тәулігіне 206 000 баррель көлеміндегі өндірісті түзетуге келісті. Бұл түзету 2026 жылдың сәуір айында енгізіледі. Тәулігіне 1,65 миллион баррель нарық жағдайының өзгеруіне байланысты ішінара немесе толықтай қайтарылуы мүмкін.

Ұйымның баспасөз хабарламасында квоталар «тұрақты әлемдік экономикалық болжам мен мұнай қорларының төмендігінен көрінетін салауатты нарықтық негіздерді ескере отырып» кеңейтілетіні аталып өткен.

Сәуір айына қажетті өндіріс кестесі:

Сауд Арабиясы — тәулігіне 10,166 миллион баррель; Ресей — тәулігіне 9,637 миллион баррель; Ирак — тәулігіне 4,299 миллион баррель; БАӘ — тәулігіне 3,429 миллион баррель; Кувейт — тәулігіне 2,596 миллион баррель; Қазақстан — тәулігіне 1,579 миллион баррель; Алжир — тәулігіне 977 000 баррель; Оман — тәулігіне 816 000 баррель.

Елдер ынтымақтастық туралы декларацияны толық орындауға, соның ішінде өндірісті қосымша ерікті түрде түзетуге ұжымдық міндеттемелерін растады, оларды бірлескен министрлік мониторинг комитеті (JMMC) бақылайды.

Олар сондай-ақ 2024 жылдың қаңтарынан бастап кез келген артық өндірісті толығымен өтейді.

ОПЕК+ ұйымының сегіз елі нарықтық жағдай мен перспективаларды қарау үшін ай сайын кездеседі. Келесі кездесу 2026 жылдың 5 сәуірінде өтеді.

Бұған дейін, 2026 жылдың 1 ақпанында өткен виртуалды кездесуден кейін ОПЕК+ елдері мұнай өндірісін көктемге дейін өзгеріссіз қалдырған болатын.