Қазақстанда 71 жыл бұрынғы температуралық рекорд жаңартылды

2026 жылдың маусымында Қазақстанда бірнеше көпжылдық температуралық рекорд жаңарды. Соның ішінде ең "ескі" рекорд Павлодарда тіркелді, ол 71 жыл бойы бұзылмай келген болатын, деп хабарлайды Tengrinews.kz.

2026 жылдың маусымы Қазақстанда қандай болды?

"Қазгидрометтің" мәліметінше, Қазақстанның басым бөлігінде маусым айы климаттық нормадан 1-5 градусқа ыстық болды. Күндізгі ауа температурасы аймақтардың көбінде +30...+38 градусты көрсетсе, елдің оңтүстігінде кей жерлерде +43 градусқа дейін жетті. Синоптиктер мұндай ауа райын құрғақ тропикалық ауа массаларының әсерімен түсіндірді.

Сонымен қатар Қазақстанның батысында керісінше жағдай байқалды: атлантикалық циклондардың салдарынан мұнда салқын әрі жаңбырлы ауа райы орнады. Бірқатар ауданда жауын-шашын мөлшері климаттық нормадан 2-5 есе асып түсті.

Синоптиктердің деректері бойынша, 1 маусымда Павлодарда ауа температурасы +36,8 градусқа дейін көтеріліп, 1955 жылғы рекордты (+36,1 градус) жаңартты.

Осы күні Алматыда да жаңа рекорд тіркелді. Ауа температурасы +34,5 градусқа жетіп, 1967 жылғы көрсеткіштен (+34,4 градус) асып түсті.

8 маусымда Астанада термометр бағандары +33,7 градусқа дейін көтерілді, бұл 2023 жылғы рекордтан (+33,6) жоғары болды.

29 маусымда елдің шығысында температуралық максимумдар жаңарды. Семейде +38 градус тіркеліп, 1992 жылғы рекорд (+36,7) бұзылса, Өскеменде температура +36,7 градусқа жетіп, 1974 жылғы көрсеткішті (+36) жаңартты.

Маусым айы қалыптан тыс ыстық температурамен ғана емес, рекордтық деңгейдегі жауын-шашынмен де ерекшеленді. Бірқатар өңірде бір тәулік ішінде бір-екі айлық нормаға тең жаңбыр жауды.

Мәселен, 3 маусымда Ақтөбе облысының Ойыл метеостанциясында айлық норма 22 миллиметр болса, 45 миллиметр жауын-шашын түсті, ал Ақтөбеде 30 миллиметр норма кезінде 33 миллиметр жауды.

Көп жауған нөсер 9 маусымда Қостанай облысының Михайловка станциясында тіркелді, онда бір тәулікте 64 миллиметр жауын жауды (айлық норма - 39 миллиметр). 24 маусымда Жетісу облысының Сарқан станциясында норма 40 миллиметр болса, 49 миллиметр жауды, ал 29 маусымда Солтүстік Қазақстан облысының Тимирязево станциясында норма 42 миллиметр болғанымен, 50 миллиметр жауын-шашын түсті.

Елордада айлық орташа ауа температурасы +24,4 градусты құрады, бұл климаттық нормадан (+19,6) 4,8 градусқа жоғары.

Астанадағы ең ыстық күн 23 маусым болды, сол күні ауа +36,8 градусқа дейін ысыды. Ең төменгі температура 2 маусымға қараған түні тіркелді - +13,1 градус.

Бір ай ішінде Астанада 24 миллиметр жауын-шашын жауды, бұл климаттық нормадан (40 миллиметр) төмен.

Тағы оқыңыз: Астана кейінгі 34 жылдағы ең ыстық күнді бастан өткерді