Қазақстанда банк саны артады Жаңа заң жобасы дайындалды

Қазақстанда банк секторындағы бәсекелестікті арттыру мақсатында «Банктер туралы» жаңа заң жобасы әзірленді.
Бұл туралы Қаржы нарығын реттеу және дамыту агенттігі төрағасының орынбасары Олжас Қизатов мәлімдеді.

Оның айтуынша, жаңа заң аясында базалық және әмбебап лицензиялау жүйесі енгізілмек. Бұл шара шағын және орта банктердің қаржы секторына енуіне мүмкіндік беріп, банк санының артуына жол ашады. Нәтижесінде, нарықтағы бәсеке күшейіп, банк өнімдері мен қызметтері халық пен бизнеске анағұрлым қолжетімді болмақ.

– Біз Ұлттық банкпен бірлесіп жаңа заңды дайындадық. Оның негізгі мақсаты – банк секторында бәсекелестікті арттыру. Жүйеге жаңа ойыншылардың келуі бұл саладағы тиімділікті арттырады деп сенеміз, – деді Олжас Қизатов.

Сонымен қатар, заң жобасында қаржылық тұрақтылықты қамтамасыз етуге бағытталған нормалар қарастырылған. Енді мемлекет барлық банктерге емес, тек жүйелік маңызы бар қаржы ұйымдарына ғана қолдау көрсетеді. Ал төлем қабілетін жоғалтқан банктердің шығынын олардың акционерлері өз есебінен өтеуге тиіс. Қазіргі уақытта төрт банктің мемлекет алдындағы жалпы қарызы 1,3 триллион теңгені құрайды.

Жаңа заңға сәйкес, Қазақстанда ислам банкингі бағытындағы қызметтер де дамитын болады. Әмбебап банктер өз лицензиясы аясында исламдық қаржыландыру құралдарын ұсынып, азаматтар шариғат талаптарына сай несие алу мүмкіндігіне ие болады.

Сондай-ақ, банк тұтынушыларының құқықтарын қорғау тетіктері де күшейтіледі. Жаңа заң жобасын биылғы жылдың соңына дейін қабылдау жоспарланып отыр.