Қазақстанда метастазды операциясыз жоюға мүмкіндік беретін заманауи ем қолданыла бастады

Қазақстанда протон терапиясы қолданыла бастады. Бұл – сәулемен емдеудің ең бір озық әдістерінің бірі. Оның артықшылығы сау тіндерге өте аз әсер ететінінде. Ұлттық ғылыми онкологиялық орталықтың аға медициналық физигі Алуа Қанатқызының айтуынша, аталған технология стандартты терапияларға қарағанда сау тіндерге сәуленің кері әсерін 60-70%-ға дейін азайтуға мүмкіндік береді, – деп хабарлайды Aikyn.kz. 

Дәстүрлі сәулемен емдеу әдісіне қарағанда протондар өз энергиясының барлығына жуығын көзделген тереңдікте жұмсайды, яғни, тікелей ісіктің ішінде таратады. Бұл обыр жасушаларын, оның маңында орналасқан тіндерге тигізбей, жоғары дәлдікпен атқылауға мүмкіндік береді және сонысымен де ең тиімді әдіс саналады.

Жаңа емдеу кешені жылына мыңға дейін ем-шара жүргізуге есептелген. Асқан дәлдікті қамтамасыз ету үшін жоғары технологиялық жабдықпен жарақтандырылған, оның ішінде 360 градусқа бұрылатын жүйе мен роботты үстел бар.

«Протон терапиясы аурудың барлық кезеңінде жүргізіледі, десе де, енді өсіп келе жатқан ағза болғандықтан, балаларды емдеуде, сондай-ақ бұрын алынған сәулелік терапияның қайталануы, яғни, рецидив кезінде қолданған әсіресе тиімді. Өйткені, ағза тіндері радиотолқынға қарсылық танытып, радиорезистентті элементтер бөледі. Ал протондар физикалық қасиетке ие болғандықтан, бұл иммунитетті жеңе алады», – деп атап өтті Алуа Қанатқызы.

Сондай-ақ қазақстандық науқастарға метастаздарды хирургиялық операциясыз жоюға мүмкіндік беретін заманауи ем жасалуда.

Ұлттық ғылыми онкологиялық орталықта ісіктерді емдеу үшін заманауи желілік үдеткіш қолданылады. Ол көп жағдайда дәстүрлі хирургияға балама ретінде пайдаланылады. Бұл туралы сәулелік терапия бөлімінің меңгерушісі Рауан Райымбеков айтып берді.

Жүйе радиохирургиялық емдеуге арналған, яғни өте қысқа уақыт ішінде ісікті жоғары дозалы радиациямен «күйдіру» жолымен жүзеге асады. Дәрігердің айтуынша, науқас сеанс кезінде ешқандай қолайсыздық сезінбейді және хирургиялық операциялармен байланысты болатын қауіптер мен асқынуға ұшырамайды, бірден күнделікті тірлігіне орала алады.

Аппаратты әмбебап мақсатта: ісіктерді тек мида ғана емес, басқа да жерлерде емдеу үшін қолдануға болады.

«Бұл радиохирургия деп аталады. Ми метастаздарын дәстүрлі хирургиялық жолмен емдеуге балама әдіс. Науқасқа ашық операция жасалмайды. Яғни, инвазивті емес, анестезиясыз тәсіл. Мұнда науқас ояу болады. Адамды жатқызамыз да, бір қалыпта қозғалтпай ұстап тұрып, ауру ошағына жоғары дозада сәуле жібереміз. Пациент ештеңе сезбейді, сол ояу қалпында қалады және әрі қарай өзінің күнделікті істерімен айналыса бере алады»,  – деді Рауан Райымбеков.