​Қазақстанда жаңа партия құрылады

Қазақстанда «Әділет» атты жаңа саяси партияның құрылатыны туралы ресми мәлімдеме жасалды. 

Бұл туралы 16 адамнан тұратын бастамашыл топ арнайы мәлімдеме жасады. Өтініш авторлары өздерін прогрессивті реформаларды және Әділетті Қазақстан құру идеясын қолдаушылар ретінде таныстырды.

Мәлімдемеде партия елді жаңғырту үдерісін жалғастыру, азаматтардың құқықтары мен бостандықтарын қорғау, сондай-ақ қоғамның күш-жігерін әділеттілік, патриотизм, еңбекқорлық, жауапкершілік және прогресс қағидаттары төңірегінде біріктіру мақсатында құрылатыны айтылған.

Бастамашылардың айтуынша, жаңа саяси ұйымның қызметі азаматтардың нақты мүдделеріне сай келуі және Жаңа Конституция қағидаттары мен Әділетті Қазақстан құндылықтарына негізделуі тиіс.

Сондай-ақ мәлімдемеде партия барлық сайлауға қатысуды жоспарлап отырғаны және кең қоғамдық қолдауға үміт артатыны атап өтілген.

Бастамашыл топ өкілдерінің хабарлауынша, олар ертең Қазақстанның Әділет министрлігіне саяси партияны тіркеуге дайындық рәсімін бастау туралы өтініш жолдамақ. Жақын уақытта құрылтай съезін өткізу де жоспарланып отыр.

Бастамашыл топ құрамына 16 адам енген, олардың 9-ы Конституциялық реформа жөніндегі комиссияның бұрынғы мүшелері:

Атабаева Гүлзира НұржанқызыБектуров Ренат НұрмолдаұлыЖаманқұлова Қарлығаш ҚалибекқызыЗәкиева Динара БолатқызыКенжеханұлы РауанКузиева Замира ЗакиржанқызыҚарабасова Лаура ШапайқызыҚұсайынов Айғазы ӘмірланұлыЛаврентьев Андрей СергеевичМатжани Нұрбек СейілханұлыНұрмұхамедов Бөріхан ЖолбарысұлыСүгірбай Аят ИсатайұлыТауан Мұхамедқали ЭдуардұлыТен Ирина СергеевнаШибутов Марат МаксұмұлыШыңғысбаева Ләззат Алтынбекқызы

Бүгін, 18:23