Қазақстанда жер қойнауын пайдаланудың бірыңғай порталы енгізіледі

Мәжіліс «Жер қойнауы және жер қойнауын пайдалану туралы» кодекске өзгерістер енгізу жөніндегі заң жобасын бірінші оқылымда мақұлдады. 

Заң жобасы Мемлекет басшысының Жолдауларында айтылған тапсырмаларды орындауға, соның ішінде жер қойнауын пайдаланудың бірыңғай платформасын енгізуге бағытталған.

Бірыңғай платформа жекешелендірілмейді және тек мемлекеттік органдарға қарасты ұйымдардың меншігінде және пайдалануында болады. Платформа өнеркәсіп секторына инвестиция тартуды арттыруға ықпал етеді. Сонымен қатар, қол қою бонустарын төлемеген аукцион жеңімпазына және оның бенефициарына бес жылға дейін пайдалы қазбаларды барлауға лицензия беруден бас тарту қарастырылған.

Жер қойнауының мемлекеттік қорын басқару бағдарламасы аясында блоктарды екі кезеңді іріктеу алынып тасталды, өтініштер бірыңғай платформа арқылы қабылданады. Елдімекендер, ұлттық парктер, қорықтар, су қорлары, қорғаныс жерлері, ұлттық компанияларға резервтелген және аукцион арқылы берілетін аумақтардан басқа, инвесторға жер учаскесін бірінші өтінім қағидасы бойынша беру қарастырылған.

Сонымен қатар, уәкілетті органға ведомстволық қарасты ұйымға геологиялық ақпаратты өңдеу және оған қол жеткізуді қамтамасыз ету өкілеттігі беріледі.

Заң жобасында қатты пайдалы қазбаларды барлауға арналған жаңа блокқа лицензия алу, барлау кезеңінде пайдалы қазбаларды өндіру, индустриялық-инновациялық жобалар үшін жер қойнауын пайдалану құқығын беру тәртіптері де айқындалған.

Бүгін, 13:42