Қазақстандағы инвестицияның абсолютті өсімі 1 млрд долларға жетті ЕАДБ

АСТАНА, 14 қаңтар – Sputnik. Қазақстан ЕАЭО елдері арасында тікелей шетелдік инвестицияны тарту қарқыны бойынша көшбасшылардың біріне айналды, деп хабарлады Еуразиялық даму банкі.

2025 жылдың бірінші жартыжылдығы бойынша Қазақстанның Еуразиялық өңір елдерінен тартқан инвестициясы 2023 жылмен салыстырғанда 11,2%-ке өсті. Бұл ретте, бүкіл өңір бойынша өсім орташа есеппен 6,4% құрады.

Қазақстанға салынған инвестицияның абсолютті өсімі шамамен 1 миллиард долларға жетті. Бұл Еуразиялық өңірдегі өзара инвестициялар өсімінің үштен бірінен астамы, дейді Еуразиялық даму банкі.

"Жинақталған тікелей шетелдік инвестиция өсіміне негізгі үлесті Ресей (0,73 млрд доллар) мен Армения (0,11 млрд доллар) қосты. Өсу құрылымы: өңдеуші өнеркәсіп жетекші орында болды (0,84 млрд доллар), агроөнеркәсіп кешені (0,34 млрд доллар) елеулі үлес қосты, ал шикізат секторында жинақталған тікелей шетелдік инвестиция 0 0,5 млрд долларға төмендеді", - деп атап өтті ЕАДБ.

Нәтижесінде Қазақстан индустриялық жобалар есебінен инвестиция ағынын жеделдете түсті. Тартылған инвестиция құрылымындағы өңдеу секторының үлесі бір жарым жыл ішінде 16%-тен 23%-ке дейін өсті, ал шикізат секторының үлесі 50%-тен 39%-ке дейін төмендеді.

"Қазақстанда жинақталған тікелей шетелдік инвестиция – 1 млрд доллар. Еуразиялық аймақ елдері тарапынан бұл жай ғана сандық өсу емес, сапалық сигнал. Бұл бір мезгілде инвестициялық ахуалдың айтарлықтай жақсарғанын және қосылған құны жоғары өнеркәсіп пен секторлардың пайдасына құрылымдық өзгерісті көрсетеді", - деді ЕАДБ бас экономисі Евгений Винокуров.

Бұл факторлар Қазақстандағы экономикалық өсудің неғұрлым орнықты және әртараптандырылған моделін қалыптастырады, деп атап өтті банк сарапшылары.