Қазақстандағы жерасты суының 3,6% кәдеге жаратылады

Елдегі жерасты су қорының тек 3,6%-і ғана күнделікті кәдеге жаратылып отыр, деп хабарлайды 24KZ. Қазіргі уақытта 4800-ден аса жерасты су орнындағы қор көлемі белгілі. Яғни тәулігіне 43,2 млн текше метр су бере алатын қор мемлекеттік балансқа тіркелді. Алайда бұлардың тәулігіне 1,5 млн текше метрі қолданылады.

Үкімет алдағы уақытта жерасты суларын көптеп пайдалануды көздеп отыр және бар суды үнемдеп ұстауға да айрықша назар аударылады. Қазір жер астындағы су қоры 4 мыңға жуық бақылау ұңғымалары арқылы қадағаланады. Олар судың деңгейін, температурасын және сапасын анықтауға жол ашады. Су ресурсын үнемдеуге келгенде тасымалдау шығындарын да азайту қажет. Себебі су арналары арқылы 40%-ке дейін су шығын болады. Осы мақсатта 14 500 шақырым канал жөнделеді. Соның арқасында 2030 жылға қарай жылына 10 млрд текше метр су үнемделеді. 

Ислам Тұрсынбек, ҚР СРИМ Халықаралық ынтымақтастық департаменті басқармасының бас сарапшысы:

- Ел ішінде суармалы жүйелердегі шығындарды азайту және су ресурстарын тиімді пайдалану мақсатында кешенді жоспар мақұлданған. Кешенді жоспар аясында су шаруашылығы нысандарын салу және реконструкциялау жоспарланған. Қазіргі таңда шамамен 160-қа жуық іс-шара жоспраланып отыр. Бұл шаралар жалпы су айналымындағы шығындарды қысқартуға және суармалы егіншіліктің өнімділігін арттыруға оң ықпал береді деп күтіліп отыр.

Ауыл шаруашылығы саласымен қатар өнеркәсіпте де суды үнемдеу маңызды. Жаңа Су кодексінде кәсіпорындарға 7 жыл ішінде суды қайта пайдалану технологиясын енгізу міндеттелген. Соның арқасында өндірісте қолданылған суды қайта пайдалану үлесі 2030 жылға қарай 28%-ке жетуге тиіс. Ал қазір бұл көрсеткіш 13%-тен сәл асқан.