Қазақстандық шахматшылардың Әлем кубогындағы алғашқы қарсыластары белгілі болды

Қазақстандық шахматшылардың әлем кубогындағы алғашқы қарсыластары белгілі болды. Үндістанда қараша айында өтетін халықаралық жарыста ел атынан 5 бірдей отандасымыз сынға түседі. 2 жылда бір рет өтетін байрақты додада кімдердің асығы алшысынан түсуі мүмкін?

17 күннен кейін Үндістанның ГОА қаласында шахматтан ерлер арасында әлем кубогының жалауы желбірейді. Бәсі жоғары байрақты додада ел намысын 5 спортшымыз қорғайды. Онда гроссмейстерлерден Қазыбек Нөгербек пен Әлішер Сүлейменов және Денис Махнёв бар. Ал халықаралық дәрежедегі шеберлерден Алдияр Аңсат пен Сәтбек Ахмединов өнер көрсетеді.   

Қазыбек Нөгербек, шахматтан халықаралық гроссмейстер:

- Мен үшін үлкен тәжірибе болады. Осындай жарыста әлі ойнап көрмедім. 2 ойын болады бізде нокаут система. Бізде 2 ойын ғана болады. Мысалы жеңсем немесе жеңілсем біздің матч аяқталады. Егер 1:1 болса, бізде тай-байк рапид немесе блиц болады. Сол үшін бұл жарыс өте ерекше. Барлығы қобалжиды.

Жақында шахматшылардың қарсыластары анықталды. Жеребе қорытындысы бойынша, Денис Махнев аргентиналық гроссмейстермен кездеседі. Әлішер Сүлейменов латвиялық, Алдияр Аңсат перулік, Сәтбек Ахмединов Үндістан өкілімен ойнайды. Ал 21 жастағы Қазыбек Нөгербек те жергілік шахматшымен кездесіп, өзара мықтыны анықтайды. Бұл жұптың жеңімпазы қазіргі әлем чемпионы яғни тағы бір Үндістан өкілі Гукеш Доммараджумен ойнайды.    

Қазыбек Нөгербек, шахматтан халықаралық гроссмейстер:

- Қарсыласты зерттейміз. Бапкерім көмектеседі. Біз тек дебют емес оның ойынның ортасында, соңында қалай ойнайтынын қараймыз. ӨЙткені ол өте маңызды. Қандай тактика жасаймыз. Ойнайтын стратегияны ойластырып отырмыз. Жаттығуда спарринг жасаймын.

Гүлмира Дәулетова, Қазақстан шахмат федерациясының атқарушы директоры: 

- Бұл жарыстың қорытындысы бойынша, ең алғашқы үштік кандидаттардың турниріне қатысады. Яғни шахматта цикл бар. Бірінші әлем кубогы өткізіледі. Одан кейін үміткерлер арасындағы турнир. Содан кейін ғана әлем матчы болады. Ол жерде тек 2 адам ойнап, әлем чемпионы тәжіне таласады. 

Ереже бойынша алғашқы кезеңде 156 қатысушы ойнап, өзара жеңімпаздарды анықтайды. Кейін 2-ші раундта рейтингте жоғары тұрған тағы 50 шахматшы сайысқа автоматты түрде қосылады. Яғни бәсекелестік өте жоғары.

Гүлмира Дәулетова, Қазақстан шахмат федерациясының атқарушы директоры: 

- Біз үшін бұл үлкен мереке. Әр 2 жыл сайын тек 1 немесе 2 шахматшы ойнайтын Қазақстан атынан. Біз Қазыбектен жеңіске жетеді деп үлкен үміт күтіп отырмыз. Олар әр ойында ә партиядан ойнайды. Бірінші классикалық шахмат. Онда әр қарсыласқа 90 минут беріледі. 40 жүрістен кейін тағы 30 мин қосылады. Ұзақ ойын көрсетеді 5-6 сағат ойнайды шахматшылар.  

Әлем кубогындағы жалпы жүлде қоры 2 млн доллар. Әр ойыншы алғашқы кезеңде 3  500, екінші айналымға шықса 7 мың доллар иеленеді. Жарыс қараша айының 1-26 сы аралығында өтеді.

Авторлары. Мерей Қанапия, Самат Қазанбаев