Қазақстанға келген 1 100 қой: Австралиядан жеткізілген жаңа партияның ерекшелігі

Фото: «Нұрсұлтан Назарбаев» халықаралық әуежайы

Астана халықаралық әуежайы 30 қазанда Австралиядан келген ерекше әуе рейсін қабылдады. Qatar Airways Cargo әуе компаниясының Boeing 777F жүк ұшағымен Қазақстанға дорпер тұқымды 1 100 қой жеткізілді. Жануарлар отандық мал шаруашылығын дамытуға арналған.

Жануарлардың алғашқы партиясы «Ерейментау-Астык-2014» ЖШС жүзеге асырып жатқан ауқымды ауыл шаруашылығы жобасы аясында Астанаға жеткізілді.

Тасымалдау үшін алыс қашықтыққа жүк тасымалдауға арналған кең фюзеляжды Boeing 777F жүк ұшағы пайдаланылды.

Әуежайдың хабарлауынша, тірі жануарларды әуе көлігімен тасымалдау кезінде арнайы ветеринариялық және санитариялық талаптарды сақтау, сондай-ақ бүкіл ұшу барысында жануарларға тиісті жағдай жасау қажет.

Қазақстанға 4 мың қой әкелу жоспарланып отыр

Жеткізілім мал шаруашылығын дамытуға бағытталған «Береке» жеңілдетілген несие беру бағдарламасы аясында жүзеге асырылуда.

Кәсіпорын барлығы 4 мың бас ұсақ мал сатып алуды жоспарлап отыр.

Жеткізілген 1 100 бас қой жоспарланған мал басының 27,5%-ын құрайды.

Осылайша, алдағы уақытта тағы 2 900 қой жеткізілуі тиіс.

Келесі партиялардың нақты қашан жеткізілетіні әуежай хабарламасында нақтыланбаған.

Дорпер тұқымының ерекшелігі неде?

Дорпер — ХХ ғасырдың бірінші жартысында Оңтүстік Африка Республикасында шығарылған етті бағыттағы қой тұқымы.

Бұл қойлар ет өндіру мақсатында өсіріледі. Тұқым тез салмақ қосуымен, төзімділігімен және әртүрлі климаттық жағдайларға бейімделу қабілетімен ерекшеленеді.

Дорпер қойларының басты ерекшелігі — қысқа жүн жабынының табиғи түрде түлеуі. Сондықтан оларды әдетте тұрақты түрде қырқудың қажеті жоқ.

Ересек қошқарлардың салмағы 90-120 келіге, ал саулықтардың салмағы 60-80 келіге дейін жетеді.

Әдетте дорпер қойларының денесі ақ, басы қара болады. Дегенмен тұтастай ақ түсті жануарлар да кездеседі.

Қазақстанда бұл тұқымды Шығыс Қазақстан облысын қоса алғанда, жекелеген фермерлік шаруашылықтар өсіріп келеді.

Қойлар неге ұшақпен жеткізілді?

Мұндай көлемдегі жануарларды тасымалдау логистиканы арнайы ұйымдастыруды талап етеді.

Кәдімгі жүктерден айырмашылығы, тірі малды тасымалдау кезінде жануарларды орналастыру жағдайын, желдетуді, ветеринариялық талаптарды және тасымалдау ұзақтығын ескеру қажет.

Астана әуежайында мұндай рейстерге қызмет көрсету халықаралық әуе жүк тасымалы саласын дамытудың бір бағыты екенін атап өтті.

Бүгін, 14:17